ఏసీ ప్రియులకు బ్యాడ్ న్యూస్.. ఈ వేసవిలో మండిపోనున్న చల్లని ఏసీల ధరలు

వేసవి ఎండల నుంచి ఉపశమనం పొందాలని ఏసీ కొనాలనుకునే వారికి షాకింగ్ న్యూస్. ప్రస్తుతం మార్కెట్‌లో పెరుగుతున్న ముడి సరుకుల ధరల ప్రభావం ఏసీల రేట్లపై భారీగా పడనుంది. ఈ వేసవిలో ఏసీల ధరలు దాదాపు 5 నుంచి 15 శాతం వరకు పెరిగే అవకాశం ఉందని వోల్టాస్ ఎండీ ముకుందన్ మేనన్ స్పష్టం చేశారు. దీంతో కొత్తగా ఏసీ కొనుగోలు చేయాలనుకునే సామాన్యుల జేబుకు చిల్లు పడటం ఖాయంగా కనిపిస్తోంది.
ఈ ధరల పెరుగుదలకు ప్రధాన కారణం అంతర్జాతీయ మార్కెట్‌లో రాగి, అల్యూమినియం, స్టీల్ వంటి లోహాల ధరలు ఆకాశాన్ని తాకడమే. ముఖ్యంగా ఏసీల తయారీలో కీలకమైన రాగి ధర ప్రస్తుతం టన్నుకు 13 వేల డాలర్లకు చేరుకుంది. దీనికి తోడు అంతర్జాతీయంగా రూపాయి విలువ క్షీణించడం వల్ల విదేశాల నుండి దిగుమతి చేసుకునే విడిభాగాల ఖర్చు పెరిగి, కంపెనీలు ధరలను పెంచక తప్పని పరిస్థితి ఏర్పడింది.
కేవలం ముడి సరుకుల ధరలే కాకుండా, ప్రభుత్వ నిబంధనలు కూడా ఏసీల రేట్లు పెరగడానికి కారణమవుతున్నాయి. కొత్తగా అమలులోకి వచ్చిన పవర్ సేవింగ్ (నక్షత్రాల రేటింగ్) నిబంధనల ప్రకారం ఏసీలను రూపొందించడం తయారీదారులకు మరింత ఖర్చుతో కూడుకున్న పనిగా మారింది. విద్యుత్ వినియోగాన్ని తగ్గించే సాంకేతికతను జోడించడం వల్ల ఉత్పత్తి వ్యయం పెరిగి, ఆ భారం చివరకు వినియోగదారుడి పైనే పడుతోంది.
అయితే ధరలు పెరిగినప్పటికీ, ఈ ఏడాది ఎండల తీవ్రత ఎక్కువగా ఉండటంతో ఏసీల డిమాండ్ ఏమాత్రం తగ్గదని పరిశ్రమ వర్గాలు భావిస్తున్నాయి. గతేడాదితో పోలిస్తే ఈసారి అమ్మకాలు దాదాపు 20 శాతం మేర పెరుగుతాయని ముకుందన్ మేనన్ ఆశాభావం వ్యక్తం చేశారు. వేడి నుంచి తప్పించుకోవడానికి వినియోగదారులు అధిక ధరలైనా సరే, ఏసీల వైపు మొగ్గు చూపుతారని మార్కెట్ నిపుణులు అంచనా వేస్తున్నారు.