10 కోట్ల రైతుల ఖాతాల్లోకి రూ.2000.. 13న జమ

దేశవ్యాప్తంగా కోట్లాది మంది రైతులు ఎదురుచూస్తున్న శుభవార్త వచ్చింది. Pradhan Mantri Kisan Samman Nidhi పథకంలోని 22వ విడత నిధుల విడుదలకు కేంద్ర ప్రభుత్వం తేదీని ఖరారు చేసింది. ఈ నెల 13న ప్రధానమంత్రి Narendra Modi రైతుల ఖాతాల్లోకి నిధులను జమ చేయనున్నారు. ఈ పథకం ద్వారా దేశవ్యాప్తంగా సుమారు 10 కోట్ల మంది రైతులకు ప్రయోజనం చేకూరనుంది. రైతుల పెట్టుబడి అవసరాలకు తోడ్పడే ఈ పథకం మరోసారి అన్నదాతలకు ఊరట కలిగించనుంది.రైతులకు అందించే పెట్టుబడి సాయంపై ఉన్న అనిశ్చితికి కేంద్రం తెరదించింది. 22వ విడత నిధులను ఈ నెల 13న విడుదల చేయనున్నట్లు అధికారికంగా ప్రకటించింది. ప్రస్తుతం అస్సాం పర్యటనలో ఉన్న ప్రధాని అక్కడి నుంచే బటన్ నొక్కి నేరుగా రైతుల బ్యాంక్ ఖాతాల్లోకి నగదు బదిలీ చేయనున్నారు.ఈ పథకం కింద కేంద్ర ప్రభుత్వం ప్రతి సంవత్సరం మూడు విడతల్లో రైతులకు ఆర్థిక సాయం అందిస్తోంది. ఒక్కో విడతలో రూ.2 వేల చొప్పున మొత్తం రూ.6 వేల రూపాయలు రైతులకు అందజేస్తోంది. విత్తనాలు, ఎరువులు వంటి వ్యవసాయ అవసరాల కోసం ఈ సాయం రైతులకు ఉపయోగపడుతోంది. ఇప్పటివరకు 21 విడతలు విజయవంతంగా పూర్తికాగా, ఇప్పుడు 22వ విడత నిధులు విడుదలకు సిద్ధమయ్యాయి.ఈ పథకం ద్వారా దేశవ్యాప్తంగా సుమారు 10 కోట్ల మంది అర్హులైన రైతులకు లబ్ధి చేకూరనుంది. అయితే నిధులు ఖాతాల్లో జమ కావాలంటే రైతులు తప్పనిసరిగా ఈ-కేవైసీ (e-KYC) ప్రక్రియ పూర్తి చేసి ఉండాలి. అదేవిధంగా ఆధార్‌కు లింక్ అయిన బ్యాంక్ ఖాతాల్లోకే నేరుగా డబ్బులు బదిలీ అవుతాయి.రైతులు తమ నిధుల స్థితిని తెలుసుకోవడానికి పీఎం కిసాన్ అధికారిక వెబ్‌సైట్‌లో ‘బెనిఫిషియరీ స్టేటస్’ ఎంపిక ద్వారా వివరాలను పరిశీలించవచ్చు. అక్కడ ఆధార్ నంబర్ లేదా మొబైల్ నంబర్ నమోదు చేస్తే తమ పేరు జాబితాలో ఉందో లేదో తెలుసుకోవచ్చు. ఏవైనా తప్పులు ఉంటే వెంటనే సరిచేసుకోవడం మంచిదని అధికారులు సూచిస్తున్నారు.అదే సమయంలో పీఎం కిసాన్ నిధుల పేరుతో వచ్చే అనధికారిక లింకులు లేదా సందేశాలపై రైతులు అప్రమత్తంగా ఉండాలని సూచించారు. అధికారిక వెబ్‌సైట్ లేదా సమీపంలోని మీ సేవా కేంద్రాలను మాత్రమే సంప్రదించడం సురక్షితమని అధికారులు తెలిపారు.