ఆపరేషన్ సిందూర్ దెబ్బ.. పాక్ మురిద్ ఎయిర్ బేస్ ధ్వంసం

పాకిస్తాన్‌కు ‘ఆపరేషన్ సిందూర్’ ప్రభావం గట్టిగానే తగిలినట్లు తెలుస్తోంది. గత ఏడాది పహల్గామ్‌లో జరిగిన ఉగ్రవాద దాడి తర్వాత భారత్ పాకిస్తాన్‌పై కఠిన ప్రతిస్పందన చూపింది. పాక్‌తో పాటు పీఓకే ప్రాంతాల్లో ఉన్న ఉగ్రవాద స్థావరాలను లక్ష్యంగా చేసుకుని భారత దళాలు దాడులు జరిపినట్లు సమాచారం. ఈ దాడుల్లో వందలాది మంది ఉగ్రవాదులు హతమైనట్లు కూడా నివేదికలు చెబుతున్నాయి.అదేవిధంగా, పాకిస్తాన్ సైన్యం భారత భూభాగాలపై దాడులకు యత్నించిన సందర్భాల్లో, పాక్ వైమానిక దళానికి చెందిన కొన్ని కీలక ఎయిర్‌బేస్‌లను భారత్ లక్ష్యంగా చేసుకున్నట్లు పేర్కొంటున్నారు. దీంతో ఆ స్థావరాలకు గణనీయమైన నష్టం వాటిల్లినట్లు తెలుస్తోంది.ఇప్పుడేమో ఆ దెబ్బతిన్న ఎయిర్‌బేస్‌లలో పాకిస్తాన్ మరమ్మతులు చేపడుతున్నట్లు సమాచారం. అయితే కొన్ని స్థావరాల్లో నష్టం తీవ్రంగా ఉండటంతో రిపేర్లు చేయడం కష్టంగా మారిందని తెలుస్తోంది. కొన్ని ప్రాంతాల్లో దెబ్బతిన్న భవనాలను పూర్తిగా కూల్చివేస్తున్నట్లు నివేదికలు సూచిస్తున్నాయి.జాతీయ మీడియా కథనాల ప్రకారం, ఫిబ్రవరి 28న వెలుగులోకి వచ్చిన శాటిలైట్ చిత్రాలను పరిశీలిస్తే, భారత దాడుల ప్రభావం మురిద్ ఎయిర్ బేస్‌పై తీవ్రంగా పడినట్లు తెలుస్తోంది. చక్వాల్ సమీపంలో ఉన్న ఈ స్థావరంలోని ఒక ప్రధాన భవనం తీవ్రంగా దెబ్బతినడంతో దాన్ని పూర్తిగా కూల్చివేసినట్లు సమాచారం. ఈ భవనం కమాండ్ అండ్ కంట్రోల్ సెంటర్‌గా ఉపయోగించబడినట్టు భావిస్తున్నారు.శాటిలైట్ చిత్రాల విశ్లేషకుడు Damien Symon తెలిపిన వివరాల ప్రకారం, తాజా శాటిలైట్ ఫొటోలలో ఆ భవనం ఉన్న ప్రదేశంలో ఇప్పుడు ఖాళీ నేల మరియు శిథిలాలు మాత్రమే కనిపిస్తున్నాయి. భవనం అంతర్గతంగా తీవ్ర నష్టం కలగడంతో మరమ్మతులు సాధ్యం కాకపోవచ్చని ఆయన అభిప్రాయపడ్డారు. ఈ స్థావరం పాకిస్తాన్ నిర్వహించే డ్రోన్ కార్యకలాపాలకు కమాండ్ సెంటర్‌గా ఉపయోగపడినట్లు కూడా విశ్లేషణలు సూచిస్తున్నాయి.