ప్రియుడిని అప్పగిస్తేనే బయటికొస్తా..యువతీ ఐదు గంటల హైడ్రామా

తన ప్రియుడిని అప్పగించేంత వరకు బయటకు రానంటూ ఓ యువతి ఇంటికి తాళం వేసుకొన్న ఘటన చిత్తూరు జిల్లా, పలమనేరులో గురువారం చోటు చేసుకుంది. పట్టణంలోని నాగులరాళ్ల వీధిలో ఉంటున్న మురుగానంద కుమార్తెకు 17 ఏళ్ల వయసు.పట్టణంలోని రెహమాన్‌ అనే యువకుడితో మూడేళ్ల క్రితం ఏర్పడిన పరిచయం ప్రేమగా మారింది. గతేడాది పెళ్లి చేసుకోవాలని ఇద్దరూ ఇంటినుంచి వెళ్లిపోయారు. అయితే తమ మైనర్‌ కుమార్తెను కిడ్నాప్‌ చేశారంటూ ఆమె తల్లిదండ్రులు పోలీసులకు ఫిర్యాదు చేశారు.

కేసు నమోదు చేసిన పోలీసులు ఆ బాలికను తల్లిదండ్రులకు అప్పగించి, రెహమాన్‌ను కోర్టుకు హాజరుపరచడంతో జైలు శిక్ష సైతం అనుభవించాడు. తరువాత ఆ బాలికను కుటుంబ సభ్యులు చదువు మాన్పించి ఇంటికే పరిమితం చేశారు. ఈ నేపథ్యంలో గురువారం ఉదయం ఇంటిముందున్న గేటుకు కుటుంబ సభ్యులు తాళం వేశారు. రూములో ఉన్న బాలిక బయటకు రావడానికి ప్రయత్నించింది. మెయిన్‌ గేటుకు తాళం వేసి ఉండడంతో, కుటుంబ సభ్యులందరూ ఇంటిలోపల ఉండగా వారిని బయటకు రానివ్వకుండా ముఖద్వారానికి తాళం వేసేసింది. దీంతో కుటుంబసభ్యులు ఇంటిలోపల, ఆ బాలిక ఇంటి ముందు వరండాలో గేటు లోపల ఉండిపోయారు.

కుటుంబ సభ్యులు ఎంత ప్రాధేయపడినా బాలిక తాళం తీయలేదు. గమనించిన చుట్టుపక్కలవాళ్లు పోలీసులకు సమాచారం ఇవ్వడంతో తహసీల్దార్‌ శ్రీనివాసులు,సీఐ శ్రీధర్‌, ఎస్‌ఐ నాగరాజు అక్కడకు చేరుకున్నారు. తాళం తీసి బయటకు వస్తే విచారించి న్యాయం చేస్తామన్నారు.అయితే తన ప్రియుడిని అప్పగిస్తేనే తాళం తీస్తానని ఆమె తెగేసి చెప్పింది.గతంలో కూడా ఇలాగే చెప్పి తన ప్రియుడిని జైలుకు పంపారన్న ఆమె రెహమాన్‌ను ఇక్కడకు తీసుకొచ్చి అప్పగిస్తేనే మాట వింటానని చెప్పింది.

ఇలా సుమారు 4 గంటల పాటు హైడ్రామా నడిచాక అధికారులు విసిగిపోయి రెహమాన్‌ తండ్రి జావెద్‌ను పిలిపించారు. ‘తలుపు తీయవమ్మా ... నువ్వు మైనర్‌ కాబట్టి తిరుపతి హోమ్‌కు పంపించి న్యాయం చేస్తా’ అని ఆయన నచ్చజెప్పడంతో ఆ బాలిక తాళం తీసి బయటకు వచ్చింది.అనంతరం ఆమెను పోలీస్‌స్టేషన్‌కు తీసుకు వచ్చి ఐసీడీఎస్‌ అధికారుల ద్వారా హోమ్‌కు పంపడానికి ఏర్పాట్లు చేశారు.