అయోధ్యలో ఆరు లక్షల దీపాలతో దీపోత్సవం....!

దీపావళి సందర్భంగా అయోధ్యలోని సరయూ నదీతీరంలో నిర్వహించిన వేడుకలు చరిత్ర సృష్టించాయి. అయోధ్య వివాదం కేసు తీర్పు మరికొద్ది రోజుల్లో సుప్రీంకోర్టు వెలువరించనున్న నేపథ్యంలో ఈ ఉత్సవాలకు ప్రాధాన్యత ఏర్పడింది. ఉత్తర్‌ప్రదేశ్ ప్రభుత్వం నిర్వహించిన ఈ వేడుకల్లో ముఖ్యమంత్రి ఆదిత్యనాథ్‌, ఫిజీ స్పీకర్‌ వీణా భట్నాగర్‌ సహా పలువురు ప్రముఖులు పాల్గొన్నారు. గత మూడేళ్లుగా యూపీ ప్రభుత్వం అయోధ్యలో దీపావళి వేడుకలను నిర్వహిస్తూ వస్తోంది.2017లో తొలిసారి రామ్‌కీ పౌడీ వద్ద 301,186 ప్రమిదలు వెలిగించగా, 2018లో 4 లక్షల 10 వేల దివ్వెలు వెలిగించారు. ఈ ఏడాది ఆరు లక్షలకుపైగా దీపాలను వెలిగించడం విశేషం. యూపీ ప్రభుత్వం, పర్యాటక శాఖ, రామ్ మనోహర్ లోహియా అవధ్ యూనివర్సిటీ సంయుక్తంగా నిర్వహించిన ఈ వేడక గిన్నీస్ వరల్డ్ రికార్డ్‌ల్లో చోటు సంపాదించింది.ఈ సందర్భంగా యూపీ సీఎం యోగి ఆదిత్యనాథ్ మాట్లాడుతూ.. గత ముఖ్యమంత్రులు అయోధ్యను సందర్శించిన దాఖలాలు లేవని, ఈ రెండున్నరేళ్లలో తాను 18సార్లు వచ్చి, వందల కోట్ల విలువైన పథకాలను మంజూరు చేశానని తెలిపారు. దేశంలోని ఏడు ప్రముఖ ఆధ్యాత్మిక నగరాల్లో మూడు యూపీలోనే ఉన్నాయని అన్నారు. దేశంలో కాదు, ప్రపంచంలోనే ఇలాంటి సంపన్న, సాంస్కృతిక వాతావరణం ఇక్కడ లేదన్నారు. రాముడి జన్మించిన ప్రదేశం మన రాష్ట్రంలోనే ఉండటం గర్వకారణమని, అయోధ్య పేరు మన మనస్సుల్లో ‘రామ రాజ్యం’ ఆలోచనను కలిగిస్తుందని అన్నారు. రామరాజ్యంలో కుల, మత, జాతి, భాష భేదంలేదని, అదే రాముడి సుపరిపాలన వ్యవస్థ అని కొనియాడారు. గత అయిదేళ్లుగా కేంద్రం అనేక పథకాలను అమలుచేస్తూ ఆధునిక రామరాజ్య స్థాపనకు ఓ ఉదాహరణగా నిలిచిందన్నారు.దీపోత్సవంలో శనివారం ఉదయం ప్రారంభమైన ఊరేగింపులో దేశంలోని నలుమూలల నుంచి కళాకారులు, ఏడు దేశాలకు చెందిన ప్రతినిధులు పాల్గొన్నారు. 2,500 మంది విద్యార్థులు రాముడి జీవితంలోని ఘట్టాలతో చిత్రాలు గీశారు. ఈ సందర్భంగా రూ.226 కోట్లతో వివిధ అభివృద్ధి, సంక్షేమ పథకాలను సీఎం యోగి ప్రారంభించారు. ఈ అయోధ్య దీపోత్సవాన్ని యూపీ సర్కారు రాష్ట్ర పండగగా ప్రకటించి ఏటా ప్రతిష్ఠాత్మకంగా నిర్వహిస్తోంది.