సినిమాలో ఛాన్స్ పేరుతో.. వ్యభిచారంలోకి...

సినిమాల పేరుతో యువతులను వ్యభిచార రొంపిలోకి లాగుతున్న ఓ ముఠా గుట్టు రట్టు చేశారు నెల్లూరు పోలీసులు. సినిమా ఛాన్స్‌ల పేరుతో యువతులకు వల వేసి.. ట్రాప్‌లో పడగానే డబ్బు ఆశచూపి లైంగికంగా అనుభవిస్తారు. ఆ సమయంలో రహస్య కెమెరాలతో దాన్ని చిత్రీకరిస్తారు. అప్పటినుంచి ఇక బ్లాక్‌మెయిలింగ్ మొదలవుతుంది. వ్యభిచారం చేయకపోతే వీడియోలను బయటపెడుతామని

బెదిరిస్తారు. అలా ఈ ముఠా చేతిలో ఎంతోమంది యువతులు బలైపోయారు. పక్కా సమాచారంతో నెల్లూరు పోలీసులు వ్యభిచార గృహంపై దాడి చేసి నిందితులను అదుపులోకి తీసుకున్నారు.

పోలీసుల కథనం ప్రకారం.. నెల్లూరులోని జ్యోతినగర్‌కి చెందిన షేక్ జాకీర్‌ హుస్సేన్ అలియాస్ మహేష్ షార్ట్ ఫిల్మ్ డైరెక్టర్‌గా స్థానికంగా ప్రచారం చేసుకున్నాడు. సినిమాల్లో అవకాశం ఇస్తామని ప్రచారం చేయడంతో..ఎంతోమంది యువతులు అతన్ని సంప్రదించేవారు. ఈ క్రమంలో కొంతమంది యువతులను ఆకర్షించి వారితో లైంగిక కోర్కెలు తీర్చుకున్నాడు. ఆ సమయంలో రహస్య కెమెరాలు పెట్టి దాన్ని చిత్రీకరించేవాడు. ఆ వీడియోలను అడ్డం పెట్టుకుని యువతులను వ్యభిచారం చేయాల్సిందిగా బలవంతపెట్టేవాడు. కొంతమంది స్నేహితులతో కలిసి కొన్నాళ్లుగా వ్యభిచార దందా నిర్వహిస్తూ డబ్బులు సంపాదిస్తున్నాడు.

ఇటీవల ఓ మైనర్ బాలిక కూడా ఇతని ఆకృత్యాలకు బలైపోయింది. అయితే ధైర్యం చేసి ఆమె పోలీసులను సంప్రదించడంతో ఈ ఉదంతం వెలుగుచూసింది. బాధిత బాలిక ఫిర్యాదుతో దర్యాప్తు ప్రారంభించిన పోలీసులు.. నెల్లూరు నగరంలోని పలుచోట్ల అతను నడుపుతున్న వ్యభిచార గృహాలపై దాడి చేశారు. ముఠా చెరలో ఉన్న ఏడుగురు యువతులకు విముక్తి కల్పించారు. కొంతమంది విటులతో పాటు నిందితులను అరెస్ట్ చేసి కేసు నమోదు చేశారు.