యువతి పై గుంటూరు ఎస్సై అత్యాచారం
Andhra Pradesh Telugu | Suryaa Desk | Published : Wed, Jan 29, 2020, 04:14 PM
గుంటూరు జిల్లా అరండల్ పేటలో దారుణం జరిగింది. కేసు పని నిమిత్తం వచ్చిన యువతిని లొంగదీసుకొని ఎస్సై అత్యాచారానికి పాల్పడ్డాడు. దీనికి సంబంధించిన వివరాలిలా ఉన్నాయి. అరండల్ పేటకు చెందిన ఎస్సై బాలకృష్ణ. ఇదే ప్రాంతానికి చెందిన యువతి, డేవిడ్ అనే యువకుడు 3 సంవత్సరాల క్రితం ప్రేమించుకున్నారు. ఇదే క్రమంలో వీరికి శారీరక సంబంధం ఏర్పడింది. అనంతరం యువతి పెళ్లి చేసుకోవాలని అడగగా డేవిడ్ నిరాకరించాడు. దీంతో యువతి డేవిడ్ తల్లిదండ్రులకు విషయం చెప్పగా 2 సంవత్సరాల తర్వాత పెళ్లి చేస్తామని వారు అన్నారు. దీంతో యువతికి, డేవిడ్ కుటుంబ సభ్యులకు గొడవలు జరుగుతున్నాయి. ఇటీవల యువతి వెళ్లి అడగగా పెళ్లికి కుదరదని వారు చెప్పారు.
దీంతో యువతి అరండల్ పేట పోలీసు స్టేషన్ లో ఫిర్యాదు చేసింది. యువతి పై కన్నేసిన ఎస్సై బాలకృష్ణ కేసు పని నిమిత్తమని యువతి ఇంటికి వచ్చాడు. ఆ సమయంలో ఇంట్లో ఎవరూ లేకపోవడంతో తన పై ఎస్సై బాలకృష్ణ అత్యాచారానికి పాల్పడ్డాడని యువతి ఆరోపిస్తుంది. దీనికి సంబంధించి గుంటూరు జిల్లా ఎస్పీకి ఫిర్యాదు చేసింది. దీంతో పోలీసు అధికారులు ఈ ఫిర్యాదు పై శాఖా పరమైన విచారణ జరుపుతున్నారు. ఈ ఆరోపణలు నిజమని తేలితే వేటు వేసేందుకు అధికారులు సిద్దమయ్యారు. యువతి ఆరోపణల పై ఎస్సై నోరు విప్పితే అసలు నిజాలు బయటపడే అవకాశం ఉంది. న్యాయం కోసం వస్తే ఎస్సై అత్యాచారానికి పాల్పడడం సంచలనంగా మారింది.
|
|