ఇంగ్లాండే ఫైనల్‌కు

మహిళల వన్డే ప్రపంచకప్‌లో ఆతిథ్య జట్టు ఫైనల్లో అడుగుపెట్టింది. మంగళవారం సెమీఫైనల్లో ఇంగ్లాండ్‌ 2 వికెట్ల తేడాతో దక్షిణాఫ్రికాపై విజయం సాధించింది. మొదట లారా వాల్‌వార్ట్‌ (66; 100 బంతుల్లో 8×4), డుప్రీజ్‌ (76 నాటౌట్‌; 95 బంతుల్లో 5×4) రాణించడంతో దక్షిణాఫ్రికా 50 ఓవర్లలో 6 వికెట్ల నష్టానికి 218 పరుగులు చేసింది. అనంతరం లక్ష్యాన్ని ఇంగ్లాండ్‌ 49.4 ఓవర్లలో 8 వికెట్లు కోల్పోయి ఛేదించింది. ‘ప్లేయర్‌ ఆఫ్‌ ద మ్యాచ్‌’ సారా టేలర్‌ (54; 76 బంతుల్లో 7×4) ఇంగ్లాండ్‌ విజయంలో కీలక పాత్ర పోషించింది. గెలుపుపై ఆశల్లేని స్థితిలో దక్షిణాఫ్రికా బౌలర్లు గొప్పగా పుంజుకుని.. తమ జట్టును పోటీలోకి తెచ్చారు. చివర్లో మ్యాచ్‌ హోరాహోరీగా మారింది. ఐతే ఫ్రాన్‌ విల్సన్‌ (30), జెన్నీ గున్‌ (27 నాటౌట్‌) పోరాడి ఇంగ్లాండ్‌ను గట్టెక్కించారు. గురువారం భారత్‌, ఆస్ట్రేలియా మధ్య జరిగే రెండో సెమీఫైనల్లో నెగ్గే జట్టుతో ఇంగ్లాండ్‌ ఆదివారం ఫైనల్‌ ఆడుతుంది.

ఆఖర్లో ఉత్కంఠ..: సెమీస్‌లో టాస్‌ గెలిచి మొదట బ్యాటింగ్‌ చేసిన దక్షిణాఫ్రికా పెద్ద స్కోరు చేసే అవకాశాన్ని సద్వినియోగం చేసుకోలేకపోయింది. ఓపెనర్‌ లిజెలీ లీ (7), త్రిష చెట్టి (15) త్వరగానే ఔటైనా.. మరో ఓపెనర్‌ లారా వాల్‌వార్ట్‌, డుప్రీజ్‌ మూడో వికెట్‌కు 77 పరుగులు జోడించడంతో దక్షిణాఫ్రికా 31వ ఓవర్లో 125/2తో పటిష్ట స్థితికి చేరుకుంది. దీంతో స్కోరు 250 పరుగులు చేరేలా కనిపించింది. కానీ లారా ఔటవడం.. మిగతా బ్యాటర్లు విఫలమవడంతో దక్షిణాఫ్రికా ఇన్నింగ్స్‌ గాడి తప్పింది. ఓ ఎండ్‌లో డుప్రీజ్‌ నిలకడగా ఆడినా.. ఆమెకు సరైన సహకారం అందకపోవడంతో ఆ జట్టు 218 పరుగులకే పరిమితమైంది. అనంతరం ఛేదనను ఇంగ్లాండ్‌ చక్కగా ఆరంభించింది. 32 ఓవర్లకు ఆ జట్టు 139/2తో నిలవడంతో ఆ జట్టు సునాయాసంగా గెలిచేలా కనిపించింది. ఐతే నిలకడగా ఆడుతున్న సారా, హెదర్‌ నైట్‌ (30)లను వరుస ఓవర్లలో ఔట్‌ చేసిన దక్షిణాఫ్రికా పోటీలోకొచ్చింది. అక్కడి నుంచి పరుగుల వేగం కూడా తగ్గడంతో క్రమంగా మ్యాచ్‌ ఉత్కంఠభరితంగా మారింది. విల్సన్‌, గున్‌ చివరి ఓవర్లలో ధాటిగా ఆడి ఇంగ్లాండ్‌ను విజయానికి చేరువ చేసినప్పటికీ, 3 ఓవర్లలో 10 పరుగులు అవసరమైన స్థితిలో 2 ఓవర్లలో 7 పరుగులే రావడం.. విల్సన్‌ కూడా ఔటవడంతో దక్షిణాఫ్రికాకు విజయంపై ఆశలు మొలిచాయి. చివరి ఓవర్లో 3 బంతులకు ఒక్క పరుగే ఇచ్చి వికెట్‌ తీసింది షబ్నిం. 3 బంతుల్లో 2 పరుగులు అవసరం కావడంతో ఉత్కంఠ పెరిగిపోయింది. ఐతే షబ్‌స్రోల్‌ నాలుగో బంతికి ఫోర్‌ కొట్టి ఉత్కంఠకు తెరదించింది.