షాపింగ్ మాల్స్ లో ఈ సేవలు ఫ్రీ

ప్రజలు నిత్యం ఏదో పనుల పైన షాప్స్ కు వెళ్తూనే ఉంటారు. అనేక వస్తువుల కొనుగోలు కోసం నిత్యం జరిగే ప్రక్రియ ఇది. ఐతే ప్రతి షాపింగ్ మాల్స్ లో కూడా కొన్ని సేవలను ఫ్రీగా అందించాలి. అవి ఏమిటంటే.. ప్రతి షాపింగ్ మాల్ లో వినియోగదారులకు ఫ్రీగా నీటి సౌకర్యం కల్పించాలి. అదే విధంగా షాపింగ్ మాల్స్ లో టాయిలెట్స్, వాష్ రూమ్స్ ఉండాలి. వాటిని ఫ్రీగా వినియోగదారుడు వినియోగించుకోవచ్చు. రెండు, మూడు ఫ్లోర్ లు ఉంటే లిఫ్ట్ సౌకర్యం కల్పించాలి. వాహనాలు నిలిపేందుకు ఫ్రీగా పార్కింగ్ సౌకర్యం కల్పించాలి. అదే విధంగా విశ్రాంతి రూమ్ కూడా ఉండాలి. వీటిలో వినియోగదారులు రెస్ట్ తీసుకోవచ్చు. షాపింగ్ కు వెంట వచ్చిన వారు ఇందులో వెయిట్ చేయవచ్చు. ఈ సేవలన్ని ఫ్రీగా షాపింగ్ మాల్స్ వారు కల్పించాలి. ఒకవేళ ఈ సేవలు లేకపోతే వెంటనే అక్కడున్న యాజమాన్యాన్ని కస్టమర్లు అడగవచ్చు. యాజమాన్యం స్పందించకుంటే వినియోగదారుల ఫోరానికి ఫిర్యాదు చేయవచ్చు. జిల్లా, రాష్ట్ర వినియోగదారుల ఫోరాలు ఉంటాయి. తగిన ఆధారాలతో వీరికి సంబంధిత షాప్స్ పై ఫిర్యాదు చేయవచ్చు. మన దేశంలో 1986లో వినియోగదారుల రక్షణ చట్టం అమలులోకి వచ్చింది. ఈ చట్టం ప్రకారం వినియోగదారులుగా మనకు ఆరు హక్కులు ప్రకటించింది.

అవి- 1. వినియోగదారుల రక్షణ- మానవప్రాణాలకు, ఆస్తికి ప్రమాదకారక వస్తువులు, సేవల నుంచి రక్షణ పొందే హక్కు. అవసరాలు తీర్చడమే కాకుండా, దీర్ఘకాలం మన్నే వస్తువులు, సేవలను పొందాలి.

2. సమాచారం పొందే హక్కు- అవాంఛిత వ్యాపార కార్యకలాపాల నుంచి వినియోగదారులకు రక్షణ కల్పించేందుకు వస్తు నాణ్యత, బరువు, స్వచ్ఛత, పుష్టి, ప్రమాణం గురించి తెలియజేయాలి.

నాణ్యమైన సేవలు పొందే సమాచారాన్ని తెలుసుకునే హక్కు ఉంది.

3. వస్తువులను, సేవలను ఎంపిక చేసుకునే హక్కు- వివిధ రకాల వస్తువులు, సేవలు పొందేటప్పుడు వాటి మధ్య రేటు తెలుసుకోవడం మంచిది. సముచిత రేటులో నాణ్యత, సేవలు పొందడం.

4. ప్రాతినిధ్యం వహించే హక్కు- వినియోగదారుల ఆసక్తిని, వారి అవసరాలను సరైన వేదికలు, ఫోరంలలో వినిపించడం. వినియోగదారుల సంక్షేమార్థం ఏర్పాటు చేసిన వివిధ వేదికలలో ప్రాతినిధ్యం వహించడం.

5. వినియోగదారుల ఫోరంలో విజ్ఞప్తి చేయడం ద్వారా సేవాలోపాలు, వస్తు లోపాల నుండి పరిహారం పొందే హక్కు- వినియోగదారులు మోసానికి గురయినప్పుడు ఫోరంలో కేసులు వేసి, తగిన పరిహారాన్ని పొందడం.

6. వినియోగదారుల విద్య హక్కు- వినియోగదారులు నిరంతరం తమ హక్కులను తెలుసుకుంటూ, తమ జ్ఞానాన్ని పెంచుకోవడం, నైపుణ్యాలను పెంపొందించుకోవడం ఎంతో అవసరం. గ్రామీణ ప్రాంతాలలో వినియోగదారులు హక్కుల పట్ల అవగాహన లేక ఎంతో మోసపోతున్నారు. భారత ప్రభుత్వం 1989లో మార్చి 15 ని వినియోగదారుల దినోత్సవంగా ప్రకటించింది. అప్పటి నుంచి ప్రతి సంవత్సరం మనం ప్రపంచ వినియోగదారుల దినోత్సవాన్ని మార్చి 15 న జరుపుకుంటున్నాం.