న్యూ ఇయర్ పేరుతో హడావిడి చేస్తే చర్యలు: డిఎస్పీ
Andhra Pradesh Telugu | Suryaa Desk | Published : Fri, Dec 31, 2021, 09:00 AM
గుంటూరు నార్త్ సబ్ డివిజన్ పరిధిలో న్యూ ఇయర్ వేడుకల నేపథ్యంలో ప్రజలు బహిరంగ ప్రదేశాల్లో కేకులు కట్ చేయడం, గుంపులు గుంపులుగా చేరడం వంటివి చెయ్యకుండా ఎవరి నివాసాల్లో వారు నూతన సంవత్సర వేడుకలు జరుపుకోవాలని గుంటూరు నార్త్ సబ్ డివిజన్ డిఎస్పీ రాంబాబు విజ్ఞప్తి చేశారు. ఈమేరకు విడుదల చేసిన ఒక ప్రకటనలో ఆయన మాట్లాడుతూ జిల్లా మొత్తం పోలీస్ 30 యాక్టు అమల్లో ఉంటుందని అన్నారు. నూతన సంవత్సర వేడుకల పేరుతో ద్విచక్ర వాహనాలపై నిర్లక్ష్యపు డ్రైవింగ్, త్రిబుల్ రైడింగ్ వంటివి చేస్తే ఉపేక్షించేది లేదని హెచ్చరించారు. ప్రతి ప్రాంతంలో డ్రంక్ అండ్ డ్రైవ్ ప్రత్యేక తనిఖీలు నిర్వహిస్తామని స్పష్టం చేశారు. మెనర్లకు ద్విచక్రవాహనాలు ఇస్తే కఠిన చర్యలు తీసుకుంటామని పిల్లలకు తల్లిదండ్రులు బైకులు ఇవ్వడం వలన ప్రతి ఏడాది నూతన సంవత్సర వేడుకల్లో వారి కుటుంబాల్లో విషాదఛాయలు అలముకుంటాయని చెప్పారు. ఒమిక్రాన్ వైరస్ విజృంభిస్తున్న తరుణంలో కోవిడ్-19 నిబంధనలు పాటిస్తూ నూతన సంవత్సర వేడుకలను ఎవరి ఇళ్లలో వారు సంతోషంగా జరుపుకోవాలని సూచించారు.
|
|