2025లో రైల్వే ఘనతలు: వందే భారత్ నుంచి అమృత్ స్టేషన్ వరకు ప్రయాణం

ఈ ఏడాది దక్షిణ మధ్య రైల్వే అద్భుతమైన విజయాలను సాధించింది. వందే భారత్ రైళ్ల పొడిగింపులు, టెర్మినల్ అభివృద్ధి, అమృత్ భారత్ స్టేషన్ల అప్‌గ్రేడ్లు, నెట్‌వర్క్ విస్తరణలు, ప్రత్యేక రైళ్ల నడపడం, మరియు కార్గో ఆదాయం పెంపు వంటి పలు రంగాల్లో రైల్వే మెరుగ్గా నిలిచింది.దక్షిణ మధ్య రైల్వే దేశంలోని ఇతర జోన్లతో పోలిస్తే పలు రంగాల్లో ఉన్నత స్థాయిని సాధించింది.ఈ ఏడాది రైల్వే అన్ని రంగాల్లో గణనీయమైన అభివృద్ధిని చూపింది. మౌలిక సదుపాయాల విస్తరణ, ప్రయాణికుల సౌకర్యాలు, కొత్త రైళ్ల ప్రవేశం, స్టేషన్ల అభివృద్ధి, ఉద్యోగుల సంక్షేమం, రవాణా సామర్థ్యం పెంపు, ఆదాయం వృద్ధి, మరియు భద్రతా చర్యల్లో నూతన శిఖరాలు నమోదు అయ్యాయి.హైదరాబాద్‌లో రైల్వే రద్దీ తగ్గించేందుకు చర్లపల్లి ఉప టెర్మినల్ ప్రారంభించబడింది. తెలంగాణలోని బేగంపేట, కరీంనగర్, వారాంగల్ స్టేషన్లు ఆధునిక సౌకర్యాలతో అభివృద్ధి చేసిన అమృత్ స్టేషన్లను మే నెలలో ప్రారంభించారు. అదనంగా, కాచిగూడ హెరిటేజ్ స్టేషన్ను రూ.2.2 కోట్లతో అభివృద్ధి చేశారు.కాచిగూడ-భగత్ కి కోటి రైలు జూలైలో, తిరుపతి-షిర్డీ రైలు డిసెంబరులో ప్రారంభించబడింది. వందే భారత్ రైళ్లను కూడా పలు సెక్షన్లలో పొడిగించారు. ఇందులో ముంబై CSMT-జల్నా-నాందేడ్ రైలు ఆగస్టులో, చెన్నై-విజయవాడ-నరసాపురం డిసెంబరులో పొడిగించబడింది.2024తో పోలిస్తే దక్షిణ మధ్య రైల్వే ఆదాయంలో గణనీయ వృద్ధి సాధించింది. సరుకు రవాణా 136.2 మిలియన్ టన్నులకు చేరింది. సరుకు ఆదాయం ₹12,841 కోట్లు, ప్రయాణికుల ఆదాయం ₹5,525 కోట్లు, మొత్తం ఆదాయం ₹19,314 కోట్లు చేరింది. ఈ ఏడాది 199 కిలోమీటర్ల ట్రాక్ విస్తరణ చేశారు.184 కిలోమీటర్ల రైల్వే ట్రాక్ విద్యుదీకరణ పూర్తయింది. సికింద్రాబాద్ డివిజన్ 100 శాతం విద్యుదీకరణ సాధించింది. 529 కి.మీ విస్తీర్ణంలో ఆటోమేటిక్ బ్లాక్ సిగ్నలింగ్ అమలు చేస్తోంది. ఇంటర్మీడియట్ బ్లాక్ సిస్టమ్ 9 సెక్షన్లలో ప్రారంభించారు. 68 లెవెల్ క్రాసింగ్‌లను రద్దు చేసి, 22 రోడ్ ఓవర్ బ్రిడ్జ్‌లు, 60 రోడ్ అండర్ బ్రిడ్జ్‌లు నిర్మాణం చేపట్టారు.దేశంలోనే అత్యధికంగా, ఇక్కడ 52 స్టేషన్లు/భవనాలు జీరో ప్లస్ ఎనర్జీ లేబెల్ గుర్తింపు పొందాయి. గుంటకల్ డీజిల్ ట్రాక్షన్ ట్రైనింగ్ సెంటర్ ఉత్తమ యూనిట్ అవార్డు అందుకుంది. అదనంగా రాయచూర్, కాచిగూడ, లింగంపల్లి స్టేషన్లు సర్టిఫికేట్ ఆఫ్ మెరిట్తో అవార్డులు పొందాయి.