పుట్టిన రోజే మృత్యువాత
Andhra Pradesh Telugu | Suryaa Desk | Published : Sat, Jan 01, 2022, 09:52 AM
స్నేహితులతో కలిసి పుట్టిన రోజు వేడుకలు నిర్వహించుకుని సంతోషంగా ఇంటికి బయలుదేరిన యువకుడిని రోడ్డుపై ఏర్పడిన భారీ గుంత బలి తీసుకుంది. నాగార్జునసాగర్ రహదారి గుండ్లపల్లి సమీపంలో గురువారం అర్ధరాత్రి ఈ విషాద ఘటన చోటుచేసుకుంది.
పోలీసులు, స్థానికులు తెలిపిన వివరాల మేరకు.. నకరికల్లు ఎన్నెస్పీ కాలనీకి చెందిన కాలె అవినాష్ (18) ఇంటర్ పూర్తి చేశాడు. అతని తండ్రి శ్రీనివాసరావు జలవనరుల శాఖలో లస్కర్గా, తల్లి రమాదేవి కేజీబీవీలో చిన్నపాటి ఉద్యోగం చేస్తున్నారు. వారికి అవినాష్, కుమార్తె మాధురి సంతానం.
గురువారం అవినాష్ పుట్టినరోజు కావడంతో కుటుంబ సభ్యులతో ఆనందంగా గడిపాడు. రాత్రికి స్నేహితులతో కలిసి వేడుకల్లో పాల్గొన్నాడు. తిరిగి ఇంటికి ద్విచక్ర వాహనంపై వస్తుండగా రహదారిపై ఏర్పడిన భారీ గుంతలో పడటంతో తలకు గాయం కావడంతో అక్కడికక్కడే దుర్మరణం చెందాడు.
పోలీసులు మృతదేహాన్ని నరసరావుపేట ఏరియా వైద్యశాలకు తరలించారు. పోస్టుమార్టం అనంతరం శుక్రవారం బంధువులకు భౌతికకాయాన్ని అప్పగించారు. కుమారుడి మృతితో తల్లిదండ్రులు రోదిస్తున్న తీరు చూపరులను కంటతడి పెట్టించింది.
|
|