బంగ్లాదేశ్‌లో మరో హిందువు దారుణ హత్య

బంగ్లాదేశ్‌లో మైనారిటీలైన హిందువులపై జరుగుతున్న దాడులు ప్రపంచ వ్యాప్తంగా తీవ్ర ఆందోళన కలిగిస్తున్నాయి. తాజాగా పెట్రోల్ పోయించుకుని డబ్బులు అడిగినందుకు ఒక హిందూ యువకుడిని కారుతో తొక్కి చంపి పారిపోయిన దారుణ ఘటన రాజ్‌బరి జిల్లాలో చోటుచేసుకుంది. రాజ్‌బరిలోని గోలంద మోర్ వద్ద ఉన్న కరీం ఫిల్లింగ్ స్టేషన్‌లో 30 ఏళ్ల రిపన్ సాహా అనే హిందూ యువకుడు కార్మికుడిగా పనిచేస్తున్నాడు. శుక్రవారం తెల్లవారుజామున సుమారు 4:30 గంటల సమయంలో ఒక బ్లాక్ కలర్ ఎస్‌యూవీ కారు పెట్రోల్ బంకుకు వచ్చింది. వారు సుమారు రూ.3,710 విలువైన పెట్రోల్ పోయించుకున్నారు.

పెట్రోల్ పోయించుకున్న తర్వాత డబ్బులు ఇవ్వకుండానే ఆ కారును వేగంగా పోనివ్వడానికి డ్రైవర్ ప్రయత్నించాడు. అది గమనించిన రిపన్ సాహా.. కారును ఆపడానికి ప్రయత్నిస్తూ వాహనానికి అడ్డంగా నిలబడ్డాడు. అయితే ఆ కారులో ఉన్న వ్యక్తులు కనికరం లేకుండా రిపన్‌ సాహాపై నుంచి కారును పోనిచ్చారు. దీంతో రిపన్ సాహాను కారుతో తొక్కించి హత్య చేసి.. ఆ తర్వాత అక్కడి నుంచి పరారయ్యారు. ఈ ప్రమాదంలో రిపన్ సాహా అక్కడికక్కడే ప్రాణాలు కోల్పోయాడు.

పెట్రోల్ బంక్‌లోని సీసీటీవీ ఫుటేజీ ఆధారంగా పోలీసులు కేసు నమోదు చేసి దర్యాప్తు చేపట్టారు. నిందితులు ఉపయోగించిన కారును గుర్తించి.. యజమాని అబుల్ హషీమ్ (55), డ్రైవర్ కమల్ హొస్సేన్‌ (43) లను అరెస్ట్ చేశారు. కారు యజమాని అబుల్ హషీమ్.. బంగ్లాదేశ్ నేషనలిస్ట్ పార్టీ (బీఎన్‌పీ) మాజీ సెక్రటరీ, జిల్లా యువదళ్ మాజీ అధ్యక్షుడు అని పోలీసులు తెలిపారు. ప్రస్తుతం ఆయన ఒక కాంట్రాక్టర్‌గా పనిచేస్తున్నారు.

పెరుగుతున్న మతపరమైన దాడులు

బంగ్లాదేశ్‌లో త్వరలో ఎన్నికలు సమీపిస్తున్న వేళ.. మైనారిటీ వర్గాలైన హిందువులు, బౌద్ధులు, క్రైస్తవులపై దాడులు పెరుగుతున్నాయని బంగ్లాదేశ్ హిందూ బౌద్ధ క్రిస్టియన్ యూనిటీ కౌన్సిల్ తీవ్ర ఆవేదన వ్యక్తం చేసింది. కేవలం 2025 డిసెంబర్ నెలలోనే 51 మతపరమైన హింసాత్మక ఘటనలు నమోదు అయినట్లు ఆ సంస్థ తెలిపింది. బంగ్లాదేశ్‌లో హిందువులపై జరుగుతున్న దాడుల పట్ల భారత ప్రభుత్వం ఇప్పటికే తీవ్ర ఆందోళన వ్యక్తం చేసింది. ఇలాంటి ఘటనలను వ్యక్తిగత గొడవలుగా చిత్రీకరించి నిందితులను వదిలేయడం వల్ల తీవ్రవాద శక్తులకు బలం చేకూరుతుందని భారత్ హెచ్చరించింది.