విశాఖ‌కు కోవిడ్ ముప్పు

విశాఖ‌కు కోవిడ్‌ మూడో ముప్పు పొంచివుంది. రెండ్రోజులుగా నమోదవుతున్న కేసులు రాబోయే ప్రమాదానికి సంకేతంగా వున్నాయి. కేసుల తీవ్రత రోజురోజుకు పెరిగే అవకాశముందని వైద్య నిపుణులు హెచ్చరిస్తున్నారు. కోవిడ్‌ నిబంధనలు పాటించ కుండా విచ్చలవిడిగా జన సమూహాల మధ్య తిరగడం, ప్రయాణించడం వంటి పలుకారణాలు కోవిడ్‌ విస్తృతికి కారణంగా చెబుతున్నారు.

ముఖ్యంగా ప‌ర్యాట‌క ప్రాంతాల్లో తీవ్ర ర‌ద్దీ పెరిగింది. ఇక పండ‌గ నేప‌థ్యంలో షాపింగ్ మాల్స్‌లో ఇసుకేస్తే రాలంత జ‌నం. ఏ ఒక్క‌రూ భౌతిక దూరం పాటించ‌డం లేదు. చాలా మంది మాస్క్‌లు కూడా ధ‌రించ‌డం లేదు. దీంతో రోజురోజుకూ మ‌ళ్లీ కోవిడ్ కేసులు పెరుగుతూ వ‌స్తున్నాయి. కోవిడ్ కంటే ఓమిక్రాన్ వ్యాప్తి త‌క్కువ‌ని, పెద్ద‌గా ప్ర‌మాదం లేద‌ని లైట్ తీసుకుంటున్నారు జ‌నం. అదే ఇప్పుడు మ‌ళ్లీ ఆందోళ‌న క‌లిగిస్తోంది. లైట్ తీసుకుంటే తీవ్ర‌మైన స‌మ‌స్య‌లు ఎదుర్కోవాల్సి వ‌స్తుంద‌ని వైద్యులు హెచ్చ‌రిస్తున్నారు.

థ‌ర్డ్ వేవ్ మొద‌టి, రెండు స్థానాలు విశాఖవే.

రాష్ట్రంలో మంగళవారం నమోదైన కేసుల్లో విశాఖ జిల్లాలో అత్యధికంగా 80 కేసులతో మొదటి వరుసలో వుంది. బుధవారం కూడా 63 కేసులు నమోదై, రెండో వరుసలో వుంది. గత నెల 26న ఆరు కేసులుండగా, బుధవారం నాటికి ఆ కేసులు ఒక్కసారి 63కు పెరిగాయి. ఈ స్థాయిలో కేసులు పెరిగితే ప్రస్తుత పడకలు, వైద్య సేవలు అందుబాటులో లేని పరిస్థితులు ఉత్పన్నం కానున్నాయి. మందులు కూడా సకాలంలో సరిపడినన్ని మార్కెట్‌లో దొరకని స్థితి ఏర్పడనుంది.

ఈ ప్రమాదం నుంచి బయటపడాలంటే ఇప్పటికైనా కోవిడ్‌ నిబంధనలు కచ్చితంగా ప్రజలు పాటించాల్సివుంది. జిల్లాలో నమోదైన 63 కేసుల్లో 50 కేసులకుపైగా నగర పరిధిలోవున్నాయి. వ్యాధి లక్షణాలతో బాధపడుతున్నవారంతా పరీక్షలు నిర్వహించుకుంటే కోవిడ్‌ రోగుల సంఖ్య గణనీయంగా పెరగనుంది. రద్దీగా వున్న కూడళ్లు, ప్రదేశాలు, ప్రాంతాలకు వెళ్లడం ఆపకపోతే సంక్రాంతి పండగ ముందే కోవిడ్‌ తీవ్రత కన్పించనుంది. జిల్లాలో బుధవారం కొత్తగా 63 కేసులు నమోదుకాగా, ఆరుగురు ఆస్పత్రుల నుంచి డిశ్చార్జ్‌ అయ్యారు. ఇప్పటికి నమోదైన మొత్తం 1, 59, 684 కోవిడ్‌ కేసుల్లో 1, 58, 212 మంది కోలుకున్నారు. 1109 మంది మరణించారు. 363 మంది చికిత్స పొందుతున్నారు. గత నెల 26 నుంచి ఈ నెల 5 వరకు నమోదవుతున్న కోవిడ్‌ కేసులను పరిశీలిస్తే వ్యాధి తీవ్రత అర్థమవుతోంది.