ఆ పదవి ఎవరికి దక్కునో..!

కృష్ణా జిల్లా పెదపారుపూడి మండల వైసిపి కన్వీనర్ పదవి బిసి సామాజిక వర్గానికా? ఓసి సామాజిక వర్గానికా? ఎస్సీ సామాజికవర్గానికా? వీరెవరికీ కాకుండా ఇతర సామాజిక వర్గాల వారికా? ఎవరికి దక్కనుందో?... ఈ విషయంలో శాసనసభ్యులవారి మస్తిష్కంలో ఏమి ఆలోచన ఉందో? అనే అనేక రకాల ఊహాగానాలు ప్రజలతో పాటు వైసిపికి చెందిన ఆశావహుల్లో కూడా సందిగ్ధత నెలకొంది.

పార్టీ అధికారంలోకి రాకముందు నుంచి వైసీపీకి చెందిన ప్రముఖ శ్రేణులందరి ఆమోదంతో కన్వీనర్‌ పదవిని బిసి సామాజిక వర్గానికి చెందిన గోగం సురేష్ కు కేటాయించడం జరిగింది. అప్పటి నుండి పార్టీ శ్రేణులంతా ఒకే తాటిపై నిలిచి ఏవిధమైన వివాదాలు లేకుండా పార్టీ కోసం కష్టించి పనిచేసి శాసనసభ్యులు కైలే అనిల్ కుమార్ గెలుపుతోపాటు మండలంలో అత్యధిక మెజారిటీని రాబట్టడంలో కూడా కీలక పాత్ర పోషించారు.

తదనంతర పరిణామాల్లో పార్టీ అధికారంలోకి రావడం ఇటీవల కాలంలో జరిగిన ఎన్నికల్లో గోగం సురేష్ ఎంపీటీసీగా గెలుపొంది పార్టీ ఆదేశాల మేరకు ఏకగ్రీవ ఎంపీపీగా ఎన్నికవడంతో మండల కన్వీనర్ పదవి ఖాళీ అయిన సంగతి ప్రజలందరికీ విదితమే. అయితే అసలు కథ ఇప్పుడే మొదలైంది. ఖాళీగా ఉన్న మండల వైసిపి కన్వీనర్ పదవి నాకు కావాలి అంటే నాకు కావాలి అనే పోటీ అంతర్గతంగా నెలకొని ఉందనేది బహిరంగ రహస్యంగా నడుస్తోంది.

దాంతో ఈ పదవిని బీసీ సామాజిక వర్గానికి ఇస్తే ఇంతకు ముందు కూడా బీసీ సామాజికవర్గానికే ఇవ్వగా ఇదేమైనా వంశపారంపర్యమైన రాజరికపు హక్కా? ఇప్పుడు కూడా అదే సామాజిక వర్గానికి ఎలా ఇస్తారనే వాదన వినిపిస్తుంది. మరోవైపు పార్టీపరంగా నిష్కళంకమైన మనసుతో నిర్దిష్ట ప్రణాళికతో అందరిని కలుపుకుపోతూ సీనియరుగా, పార్టీపరంగానూ శాసనసభ్యుల వారికి అత్యంత ఆప్తునిగానూ, వివాదరహితుడిగా పేరొందిన ఓసి సామాజికవర్గానికి చెందిన వ్యక్తికి ఇస్తారో? లేక ఎస్సీ సామాజిక వర్గానికి చెందిన వారికి ఇస్తారో, ఇదీ అదీ కాకుంటే ఇతర సామాజికవర్గాలకు చెందిన వారిని ఎవరినైనా తెర మీదకు తీసుకు వస్తారా? అనే సందిగ్ధత మండల ప్రజానీకంతో పాటు ఆశావహుల్లో కూడా నెలకొని ఉంది.మరి ఈ సందిగ్దతకు ఎప్పుడు తెర పడుతుందో వేచి చూడాలి.