పైకి వ్యాపారం...ఇంట్లో డ్రగ్స్ తయారి

పైకి వ్యాపారం...ఇంట్లో మాత్రం అక్రమంగా డ్రగ్స్ తయారి. గట్టుచపుడు కాకుండా సాగుతున్న ఈ వ్యవహారాన్ని పోలీసులు ఛేధించారు. నైజీరియాకు చెందిన రిచర్డ్ అనే వ్యక్తి, అతని పెద్ద అన్న బిజినెస్ వీసా మీద భారత్ రావాలని ప్రయత్నించారు. 2019లో బిజినెస్ వీసాతో రిచర్డ్, అతని అన్న దేశరాజధాని ఢిల్లీకి చేరుకున్నారు. అప్పటి నుంచి ఢిల్లీలోనే ఉంటున్న రిచర్డ్, అతని అన్న ఆరు నెలల క్రితం బెంగళూరు చేరుకున్నారు. ఆరు నెలల క్రితం బెంగళూరు చేరుకున్న రిచర్డ్, అతని అన్న మొదట రామమూర్తి నగర్ లో అద్దె ఇల్లు తీసుకుని నాలుగు నెలలు అక్కడే ఉన్నారు. రామమూర్తి నగర్ లో నివాసం ఉండే సమయంలో రిచర్డ్, అతని అన్న మేము వ్యాపారం చేస్తున్నామని ఇంటి యజమానితో పాటు స్థానికులను నమ్మించారు. రెండు నెలల క్రితం బెంగళూరు శివార్లలోని సోలదేవనహళ్ళి పోలీస్ స్టేషన్ పరిధిలోని తరబనహళ్ళిలో అద్దె ఇంటిని తీసుకుని రామమూర్తి నగర్ లోని ఇంటిని ఖాళీ చేశారు. పైకి వ్యాపారుల్లా హలో బ్రదర్స్ టైపులో నటించిన రిచర్డ్ సోదరులు లోపల కిలాడీ బ్రదర్స్ చేసే పనులు చేస్తున్నారు. ఇంట్లోనే లక్షల రూపాయల విలువైన డ్రగ్స్ తయారు చేసి ఐటీ హబ్ బెంగళూరు నగరంతో పాటు వారికి ఎక్కడెక్కడ నెట్ వర్క్ ఉందో అక్కడికి ఆ డ్రగ్స్ సరఫరా చేస్తున్నారు. కచ్చితమైన సమాచారం అందండంతో క్రైమ్ బ్రాంచ్ పోలీసులు రిచర్డ్ నివాసం ఉంటున్న ఇంట్లోకి ఎంట్రీ ఇచ్చారు. డ్రగ్స్ తయారు చెయ్యడానికి ఉపయోగించే కెమికల్స్ తో పాటు రసాయనాలు, కుక్కర్ ను పోలీసులు స్వాధీనం చేసుకున్నారు. పోలీసులు దాడి చేసిన సమయంలో రిచర్డ్ పోలీసులకు చిక్కిపోయాడు, రిచర్డ్ ఇంటిలో రూ. 50 లక్షల విలువైన 900 గ్రాముల కోకైన్, 50 గ్రాముల విలువైన ఎండీఎం క్రిష్టల్, ఎండీఎం తయారు చేసే రసాయనాలు స్వాధీనం చేసుకున్నామని పోలీసు అధికారులు తెలిపారు. ఢిల్లీలో తలదాచుకున్న రిచర్డ్ అన్న కోసం గాలిస్తున్నామని బెంగళూరు పోలీసు అధికారులు తెలిపారు.