70 ఏళ్లుగా పోలీసులకు చిక్కకుండా...డ్రైవింగ్ లైసెన్స్ లేకుండా వాహనం నడిపాడు

కొన్ని ఘటనలు షాక్ ఇచ్చేలా ఉంటాయి. అలాంటి ఘటనే బ్రిటన్ పోలీసులకు ఎదురైంది. లైసెన్స్ లేకుండా వాహనం నడిపితే నేరం. అందుకే వాహనదారులను ట్రాఫిక్ పోలీసులు ఎప్పుడూ చెక్ చేస్తుంటారు. లైసెన్స్ లేకుండా దొరికిన వారికి జరిమానా విధిస్తుంటారు. అదెంత ప్రమాదమో వివరిస్తూ కౌన్సెలింగ్ కూడా నిర్వహిస్తారు. అలాంటిది ఓ వ్యక్తి లైసెన్స్ లేకుండా 70 సంవత్సరాలకుపైగా డ్రైవింగ్ చేస్తున్నాడు. ఇన్నేళ్లకు పోలీసులకు పట్టుబడడంతో ఆ విషయం తానే స్వయంగా చెప్పాడు. బ్రిటన్‌లోని నాటింగ్ హామ్‌లో పోలీసులు రోటీన్ పెట్రోలింగ్ నిర్వహించారు. ఇందులో భాగంగా ఓ సూపర్ మార్కెట్ కార్ పార్కింగ్‌లో 80 ఏళ్ల వయస్సులో ఉన్న డ్రైవర్‌ను లైసెన్స్ చూపించమని అడిగారు. అయితే అతని దగ్గర డ్రైవింగ్ లైసెన్స్, ఇన్సూరెన్స్ కూడా లేవని చెప్పాడు. 1938లో జన్మించిన ఆయన తనకు 12 ఏళ్ల నుంచి లైసెన్స్ లేకుండానే కారు నడుపుతున్నట్టు చెప్పాడు. దాంతో పోలీసులు చాలా ఆశ్చర్యపోయారు. పైగా తననెప్పుడు పోలీసులు అడ్డుకోలేదని, ఇప్పటి వరకూ ఎలాంటి ప్రమాదం కూడా జరగలేదని చెప్పుకొచ్చాడు. ఈ విషయాన్ని ఆ పోలీసులు ఫేస్‌బుక్‌లో పోస్ట్ చేశారు. తాము పట్టుకున్న ఓ వ్యక్తి 12 ఏళ్ల వయస్సు నుంచి డ్రైవింగ్ లైసెన్స్ లేకుండానే నడుపుతున్నాడని, ఇది నమ్మలేకపోతున్నామని పేర్కొన్నారు. అలాగే లైసెన్స్ లేకుండా డ్రైవింగ్ చేస్తే నేరమని, శిక్షపడే అవకాశం ఉందని పోస్ట్‌లో వెల్లడించారు. ఇక డ్రైవర్‌కు బీమా లేకపోతే జరిమానా ఎంతైనా పడే ప్రమాదం ఉందని, వాహనాలను సీజ్ చేసే అధికారం పోలీసులకు ఉంటుందని పేర్కొన్నారు. అయితే ఈ కేసులో ఆ వ్యక్తికి ఎలాంటి శిక్ష విధించారో అధికారులు చెప్పలేదు. కానీ ఆ కారుకు సంబంధించిన ఫోటోను షేర్ చేశారు.