ఆమె ప్రతిభ వింటే వహ్వా అనాల్సిందే

ఎవరైనా చిన్నారులు అక్షరదోషాలు లేకుండా రాస్తే అభినందిస్తాం. చేతిరాత బాగుంటే ప్రశంసిస్తాం. రెండు లేదా మూడు భాషల్లో రాయగలిగితే వారి ప్రావీణ్యాన్ని మెచ్చుకుంటాం. అయితే ఆ యువతి ప్రతిభ మాత్రం అంతకు మించి ఉంటుంది. చేతిరాతతోనే అద్భుతాలు సృష్టిస్తూ ఎంతో మంది ప్రశంసలు అందుకుంటోంది. దీనికి సంబంధించిన వివరాలు ఇలా ఉన్నాయి.

ఏపీలోని చిత్తూరు జిల్లా వడమాలపేట మండలం, ఓబులరాజు కండ్రిగకు చెందిన సింగరాజు భాస్కర్ రాజుకు ముగ్గురు సంతానం. తన పిల్లలకు అందమైన హ్యాండ్ రైటింగ్ కోసం శిక్షణ ఇచ్చాడు. ఇందుకు మేక్ మై బేబీ జీనియస్ పేరుతో ఓ స్కూల్‌ను కూడా స్థాపించాడు. దాని ద్వారా ఎంతోమంది పిల్లలకు నైపుణ్య శిక్షణ ఇస్తున్నారు. తండ్రి శిక్షణలో రాటుదేలిన పెద్దమ్మాయి అశ్విని ఒకటి కాదు రెండు కాదు.. ఏకంగా 21 భాషలపై పట్టు సాధించింది. ముత్యాల్లాంటి హ్యాండ్ రైటింగ్‌ను రెండు చేతులతోనూ రాయగలగడం ఈమె ప్రత్యేకత.

18 భారతీయ భాషలు, మూడు విదేశీ భాషలలో అశ్వినికి పట్టుంది. తెలుగు, తమిళం, హిందీ, కన్నడం, మలయాళం, అస్సామీ, బెంగాలీ, గుజరాతి, కొంకణి, మరాఠీ, మైథిలి, మణిపూరి, ఒరియా, పంజాబీ, సంస్కృతం, శాంతలి, సింధూ, ఉర్దూ భాషలను చక్కగా రాస్తోంది. ఇంగ్లిష్, నేపాలీ, అరబిక్ వంటి పాశ్చాత్య భాషలను రాయడంలోనూ ఆమె నైపుణ్యం సాధించింది.

క్లిష్టమైన మిర్రర్ రైటింగ్‌తో పాటు అప్ సైడ్, డౌన్ సైడ్ రైటింగ్ కూడా ఆమెకు కొట్టిన పిండి. మన దేశంలో అతి తక్కువ మంది మాత్రమే మిర్రర్ రైటింగ్ రాయగలరని, అందులోనూ అప్ సైడ్, డౌన్ సైడ్ రైటింగ్ అత్యంత కష్టమని చేతిరాత నిపుణులు పేర్కొంటున్నారు. చదువులో వెనుకబడ్డ, ఆటిజంతో ఉన్న పిల్లలను తీర్చిదిద్దడమే తన లక్ష్యమని అశ్విని చెబుతోంది. తన తండ్రి నేర్పిన విద్యతో జీనియస్ బుక్ ఆఫ్ రికార్డ్స్, వండర్ బుక్ ఆఫ్ రికార్డ్స్, తెలుగు బుక్ ఆఫ్ రికార్డ్స్, రికార్డ్ హోల్డర్ రికార్డ్స్, అమేజింగ్ వరల్డ్ రికార్డ్‌ల తన పేరు నమోదైందని గర్వంగా చెబుతోంది.