ఫేస్‌బుక్‌లో అందమైన అమ్మాయిలతో వల!

అందమైన అమ్మాయిల నుంచి తొలుత ఫేస్‌బుక్ ఫ్రెండ్‌ రిక్వెస్ట్ కనిపిస్తుంది. దానిని అంగీకరించగానే అవతలి వారు తీయగా కవ్విస్తారు. తమ అందాలను ఎర వేసి, నగ్నంగా మాట్లాడుకుందామని వీడియో కాల్‌ చేస్తారు. వారి ఒంటిపై దుస్తులను అన్నీ తీసేస్తారు. అవతలి వ్యక్తి దుస్తులు తీసేయాలని కోరతారు. అప్పటికే అమ్మాయి మత్తులో ఉన్న వారు తమ దుస్తులు కూడా తీసేస్తారు. ఇవన్నీ పూర్తయిన కాసేపటికి బాధితుడికి తాను బట్టల్లేకుండా ఉన్న వీడియో వాట్సాప్‌కి వస్తుంది. దీంతో ఇలాంటి వారంతా తమ కాళ్ల కింద భూమి కదులుతుందనే ఫీలింగ్‌కు లోనవుతారు. కొందరు నిందితులు చెప్పినంత ముట్టచెబుతారు. చెల్లించలేని కొందరు బలవన్మరణాలకు పాల్పడుతున్నారు. ఇటువంటి ఘటనలపై పోలీసులందించిన వివరాలిలా ఉన్నాయి.

ముంబయి, చెన్నై, బెంగుళూరు, హైదరాబాద్, విశాఖపట్నం, విజయవాడ నగరాల్లో యువకులు ఇటీవల హనీట్రాప్‌లో చిక్కుకున్నారు. ఫలితంగా నిందితులకు రూ.కోట్లు ముట్టజెప్పారు. చిక్కడపల్లిలో ఓ ప్రైవేటు కంపెనీ ఉద్యోగి కూడా వీరి బారిన పడి, రూ.9 లక్షలు వారికిచ్చాడు. జూబ్లీహిల్స్‌కు చెందిన ఓ సాఫ్ట్‌వేర్‌ ఉద్యోగి కూడా రూ.12లక్షలు బదిలీ చేశాడు. అశోక్‌నగర్‌లో ఓ వైద్యుడు రూ.15 లక్షల డబ్బులు సమర్పించుకున్నాడు. సమాజంలో పరువు పోకూడదనే ఉద్దేశంతో సైబర్ నేరగాళ్లు అడిగినంత అందజేస్తున్నారు.

ఇటీవల నగ్నవీడియోలతో తమను బ్లాక్‌మెయిల్‌ చేస్తున్నారంటూ ఫిర్యాదులు వెల్లువెత్తాయి. దీంతో హైదరాబాద్‌ సైబర్‌ క్రైం పోలీసులు ఇటువంటి ఘటనలపై దృష్టిసారించారు. బాధితుల నుంచి ఫిర్యాదులు నమోదు చేసుకుని దర్యాప్తు చేపట్టారు. విచారణలో భాగంగా నిందితులను అరెస్ట్‌ చేసేందుకు రాజస్థాన్‌లోని భరత్‌పూర్‌జిల్లాకు వెళ్లారు. అక్కడ నిందితులను అరెస్ట్ చేశాక పోలీసులకు నివ్వెరబోయే విషయాలు తెలిశాయి. నిందితులంతా కనీసం పదో తరగతి కూడా పాస్ అవ్వలేదని గుర్తించారు. అయినప్పటికీ సమాజంలో మంచి ఉద్యోగం, హోదా, సంపాదన ఉన్నవారినే టార్గెట్ చేశారని తెలుసుకున్నారు. అతి తక్కువ కాలంలోనే రూ.25 కోట్లు సంపాదించారని తెలిసి నోరెళ్లబెట్టారు. తెలంగాణ, ఏపీతో సహా 12 రాష్ట్రాల్లో వీరిపై కేసులున్నట్లు నిర్ధారించుకున్నారు. అసలు అమ్మాయే లేకుండా వీడియో కాల్ ద్వారా బ్లాక్ మెయిలింగ్‌లకు పాల్పడుతున్నట్లు తెలుసుకుని, నెటిజన్లకు దీనిపై సూచనలు చేశారు. అపరిచితుల ఫ్రెండ్ రిక్వెస్ట్‌లను యాక్సెప్ట్ చేయొద్దని, బెదిరింపులు వస్తే తమకు ఫిర్యాదు చేయాలని సూచిస్తున్నారు.