దేశం కోసం పిల్లి కూడా పులిగా మారుతుంది: ప్రశంసలందుకొంటున్న వీడియో

సోషల్ మీడియా వచ్చాక వీడియోలు వైరల్ కావడంతో ప్రపంచంలో ఏ మూలన ఏం జరిగినా అందరికీ తెలిసిపోతోంది. ఉక్రెయిన్‌లో రష్యా దాడులపై అక్కడి ప్రజలు రగిలిపోతున్నారు. ప్రాణాలు అరచేతిలో పెట్టుకుని షెల్టర్లలో తలదాచుకుంటున్న వారంతా రష్యాపై ఆగ్రహం వ్యక్తం చేస్తున్నారు. చాలామంది తమ నిస్సహాయ పరిస్థితిపై కన్నీరు పెట్టుకుంటున్నారు. అలాగే రకరకాలుగా వారి కోపాన్ని, అసంతృప్తిని, దేశం పట్ల తమకున్న భక్తిని కూడా వ్యక్తం చేస్తున్నారు. ఒక చిన్నారి రష్యా సైనికుడిపై విరుచుకుపడింది. ఇక్కడకు ఎందుకొచ్చావంటూ కేకలు వేసింది. ఆ వీడియో సోషల్ మీడియాలో వైరల్ అయింది. తాజాగా ఇంకో వీడియో కూడా వైరల్ అవుతోంది. రష్యా సైన్యం పట్ల ఉక్రెయిన్‌ రైతు వ్యవహరించిన తీరు నెటిజన్ల మనస్సును తాకింది. అక్కడ ఓ సాధారణ రైతు ఏకంగా ర‌ష్యాకు చెందిన ఓ మిలట్రీ ట్యాంకునే ట్రాక్ట‌ర్‌తో ఈడ్చుకెళ్లాడు. ఈ ట్యాంకు వెనుక ఓ వ్య‌క్తి పరుగులు తీశాడు. కేవ‌లం ఏడు సెక‌న్ల వీడియో మాత్ర‌మే ఇది. ఇప్ప‌టికి దాదాపు 4.6 మిలియ‌న్ల మంది చూశార‌ట‌. ఈ వీడియోను చూస్తూ.. ఉక్రెయిన్ ప్ర‌జ‌ల ధైర్యాన్ని నెటిజ‌న్లు తెగ మెచ్చుకుంటున్నారు. మంచి పనిచేశాడంటూ అభినందిస్తున్నారు. దేశం పట్ల ఉండే అభిమానం ముందు ఏదైన దిగదుడుపే. పిల్లి కూడా పులిలా మారి గర్జిస్తుంది. అందుకే అక్కడ చిన్న పిల్లలు కూడా ప్రశ్నిస్తున్నారు. కాగా ఉక్రెయిన్‌పై రష్యా దాడులు ఐదో రోజుకు చేరుకున్నాయి. ఇరు దేశాల మధ్య చర్చలు కొలిక్కిరాకపోగా మరిన్ని ఉద్రిక్త పరిస్థితులు చోటుచేసుకున్నాయి. రష్యా ఇప్పటికే అణు దాడులకు గ్రీన్ సిగ్నల్ ఇచ్చారు. ఇటు ఉక్రెయిన్‌ కూడా రష్యా బలగాలను అంతే ధీటుగా ఎదుర్కొంటున్నారు. ఏ మాత్రం వెనుకడుగు వేయడం లేదు.