డైవర్స్ కేసులో హైకోర్టు సంచలన తీర్పు

భార్యాభర్తలు వీడిపోయిన సందర్భంలో భార్యకు భర్త భరణం ఇవ్వటం చాలా ఏళ్ల నుంచి వస్తున్న పద్ధతి. అయితే వీడాకులు తీసుకునే భార్య తన భర్తకు భరణం ఇవ్వాలని బొంబాయి​ హైకోర్టు ఔరంగాబాద్ తీర్పు చెప్పింది. మహారాష్ట్రలోని నాందేడ్​ సివిల్​ కోర్టు ఇచ్చిన తీర్పును సమర్థించింది. సివిల్​ కోర్టు తీర్పును సవాల్​ చేస్తూ వేసిన పిటిషన్​ను కొట్టివేసింది.
1992లో ఓ జంటకు వివాహం జరిగింది. కుటుంబ కలహాలతో భర్త నుంచి విడాకులు ఇప్పించాలని 2015లో భార్య నాందేడ్​ సివిల్​ కోర్టును ఆశ్రయించింది. విచారణ చేపట్టిన కోర్టు వారికి అదే ఏడాది విడాకులు మంజూరు చేసింది. హిందూ వివాహ చట్టం 1955లోని సెక్షన్​ 24, 25 ప్రకారం భార్య నుంచి శాశ్వత భరణం, జీవనాధార ఖర్చులు ఇప్పించాలని కోరుతూ ఆమె భర్త పిటిషన్​ వేశారు. తనకు జీవనాధారం ఏమీ లేదని, భార్య ప్రభుత్వ ఉద్యోగం చేస్తూ మంచి వేతనం తీసుకుంటున్నట్లు పిటిషన్​లో పేర్కొన్నారు. భర్త పిటిషన్​ను విచారణకు స్వీకరించిన నాందేడ్​ సివిల్​ కోర్టు భరణం ఇవ్వాలని భార్యను ఆదేశించింది. దీంతో ఆమె నాందేడ్​ సివిల్​ కోర్టు తీర్పును సవాల్​ చేస్తూ ఔరంగాబాద్​ హైకోర్టును ఆశ్రయించింది.
ఔరంగాబాద్​ హైకోర్టులో విచారణ సందర్భంగా విడాకులు మంజూరయ్యాక వారి బంధం ముగిసిపోయిందని, ఎలాంటి భరణం ఇవ్వాల్సిన అవసరం లేదని పిటిషనర్​ తరఫు న్యాయవాది కోర్టుకు తెలిపారు. అయితే హిందూ వివాహ చట్టంలోని సెక్షన్​ 25 ప్రకారం ఎప్పుడైనా భరణం కోరుతూ పిటిషన్​ వేయవచ్చని భర్త తరఫు న్యాయవాది అన్నారు. ఇరు పక్షాల వాదనలు విన్న కోర్టు భర్తకు భార్య భరణం ఇవ్వాలని తీర్పు వెల్లడించింది.
సివిల్​ కోర్టులో వాదనలు, సమర్పించిన డాక్యుమెంట్లు, గతంలో సుప్రీం కోర్టు ఇచ్చిన తీర్పును పరిశీలించిన హైకోర్టు సివిల్​ కోర్టు ఇచ్చిన తీర్పును సమర్థించింది. భర్తకు భరణం ఇవ్వాల్సిందేనని స్పష్టం చేసింది.