మూడు నెలల్లో ఎన్నికలు అసాధ్యం: పాక్ ఎన్నికల కమిషన్

పాకిస్థాన్ ప్రధాని ఇమ్రాన్ ఖాన్‌పై ప్రతిపక్షాలు ప్రవేశపెట్టిన అవిశ్వాస తీర్మానాన్ని జాతీయ అసెంబ్లీ డిప్యూటీ స్పీకర్‌ ఖాసీం సురీ తిరస్కరించిన విషయం తెలిసిందే. ఈ తీర్మానాన్ని స్పీకర్ తిరస్కరించిన కొద్ది నిమిషాల్లో పార్లమెంట్‌ను రద్దుచేయాలని కోరుతూ ఇమ్రాన్ ఖాన్ అధ్యక్షుడు అరిఫ్ అల్వీ‌కి సిఫార్సు చేయడం, ఆయన ఆమోదించడం చకచకా జరిగిపోయాయి. పార్లమెంట్ రద్దుకావడంతో మూడు నెలల్లో ఎన్నికలు జరుగుతాయని ప్రకటించారు. అయితే, మూడు నెలల్లో ఎన్నికలు అసాధ్యమని ఎన్నికల కమిషన్ సీనియర్ అధికారి తాజాగా తేల్చిచెప్పారు.

నియోజకవర్గాల పునర్విభజనే అందుకు కారణమని ఆయన పేర్కొన్నారు. ప్రత్యేకించి ఖైబర్ ఫఖ్తుంఖ్వాలో 26వ రాజ్యాంగ సవరణ ప్రకారం సీట్ల సంఖ్యను పెంచడం సహా జిల్లా, నియోజకవర్గాల వారీగా ఓటర్ల జాబితాను రూపొందించడం వంటి ప్రధాన సవాళ్లతో సాధారణ ఎన్నికల సన్నాహకానికి దాదాపు ఆరు నెలల సమయం పడుతుందని ఆయన అన్నారు.

అటు, ఈ అంశాన్ని సుమోటాగా స్వీకరించిన పాక్ సర్వోన్నత న్యాయస్థానం ఐదుగురు సభ్యుల విస్తృత ధర్మాసనం విచారణ చేపట్టింది. అయితే, సోమవారం ఎటువంటి నిర్ణయం వెలువరించకుండానే విచారణను వాయిదా వేసింది. ఈ సమయంలో మాత్రం స్పీకర్ చర్యలను పాక్ చీఫ్ జస్టిస్ ఉమర్ అటా బందియల్ తప్పుబట్టారు. రాజ్యాంగంలోని ఆర్టికల్ -5ను స్పీకర్ ఉదహరించినప్పటికీ అవిశ్వాస తీర్మానాన్ని తిరస్కరించలేరని వ్యాఖ్యానించారు.

‘‘అవిశ్వాస తీర్మానాన్ని తిరస్కరించడం తప్పా స్పీకర్‌కు మరే అవకాశం లేదా? అవిశ్వాస తీర్మానాన్ని స్పీకర్ నిజాయితీగా తిరస్కరించారని చెబుతున్నారా?’’ అని జస్టిస్ బందియల్ అన్నట్టు ది న్యూస్ పత్రిక తెలిపింది.

‘‘రాజ్యాంగంలోని ఆర్టికల్-5ను ఉదాహరణగా చూపినా అవిశ్వాస తీర్మానాన్ని స్పీకర్ తిరస్కరించలేరు’’ అని చీఫ్ జస్టిస్ అన్నారు. అంతేకాదు, దేశం రాజ్యాంగ సంక్షోభాన్ని ఎదుర్కొంటోందని ధర్మాసనంలోని మిగతా న్యాయమూర్తులు ఆందోళన వ్యక్తం చేశారని ఆయన పేర్కొన్నారు.

మరోవైపు, మొత్తం 342 మంది సభ్యులున్న జాతీయ అసెంబ్లీలో ఇమ్రాన్‌ ఇప్పటికే మెజారిటీని కోల్పోయారు. సొంతపార్టీకి చెందిన ఎంపీలు సైతం ఇమ్రాన్‌కు ఎదురుతిరిగారు. దీంతో ఆయన పదవి నుంచి తప్పుకోవడం దాదాపు ఖాయమైంది. కానీ, తాను చివరి బంతి వరకూ ఓటమిని అంగీకరించబోనని మాజీ క్రికెటర్ చెబుతూ వచ్చారు. తాను చెప్పినట్టుగానే క్రీజులోకి దిగకుండానే యార్కర్‌ను సంధించిన విపక్షాలకు ఇమ్రాన్ క్లీన్ బౌల్డ్ చేశారు.

మూడవిపక్షాలు ప్రవేశపెట్టిన అవిశ్వాస తీర్మానాన్ని విదేశీ కుట్రగా పదే పదే ఇమ్రాన్ ఆరోపిస్తున్నారు. దీని వెనుక అమెరికా హస్తం ఉందని ఆయన బాహటంగానే ప్రకటించడం గమనార్హం. దీనిపై అమెరికా రాయబారిని పిలిపించి మరీ నిరసన తెలిపారు.