జీతం..బోనసే కాదు..లాభాల్లో కొంత మొత్తాన్ని ఇచ్చిన బాస్

సంస్థ ఎండీ అంటే  ఇలావుండాలి అనే ఘటన ఇది. ఏ కంపెనీలోనైనా పని చేసినందుకు జీతాలు ఇస్తారు. అప్పుడప్పుడు బోనస్‌లు అందిస్తుంటారు. సంస్థ పాలసీ ప్రకారం సంవత్సరానికోసారి ఎంప్లాయీస్‌కి ఇంక్రిమెంట్లు వేస్తారు. కానీ యూకేలో ఓ సంస్థ ఎండీ అక్కడితో ఆగిపోలేదు. తన కార్మికుల కష్టాల్లో భాగం పంచుకున్నాడు. తన కంపెనీకి వచ్చిన లాభాల్లో కొంత భాగాన్ని వారికి అందించి వారితో హీరో బాస్ అనిపించుకున్నాడు. బ్రిటన్‌లో పెరుగుతున్న ధరలు, బిల్లులతో చాలామంది తీవ్ర ఇబ్బందులు పడుతున్నారు. దీనిని దృష్టిలో పెట్టుకుని ఓ సంస్థ ఎండీ జేమ్స్ హిప్ కిన్స్ తన దగ్గర పని చేసే వ్యక్తులు జీతంతో పాటు అదనంగా డబ్బులు ఇచ్చాడు.

ఎమెరీస్ టింబర్ అండ్ బిల్డర్స్ మర్చంట్స్ మేనేజింగ్ డైరెక్టర్ జేమ్స్ హిప్‌కిన్స్ 60 మంది కార్మికులకు ఒక్కొక్కరికి రూ.75 వేల రూపాయలను అందజేశాడు. అంటే తన సిబ్బంది కోసం ఏకంగా 44 లక్షల రూపాయలను ఇచ్చారు. పెరుగుతున్న ధరలతో ఉద్యోగుల కష్టాలు పడుతున్నారని, ఆ విషయం తనకు బాగా తెలుసునని, వారికి సాయం చేయడానికే బోనస్‌ అందించానని జేమ్స్ (51) చెప్పాడు. ముగ్గురు పిల్లలున్న జేమ్స్ సంస్థ సాధించిన విజయాలు వారితో పంచుకోవాలనుకున్నానని కూడా చెప్పాడు. కంపెనీ పొందిన లాభాల్లో కొంత భాగాన్ని తన స్టాఫ్‌‌కే అందించాడు. ఈ సమయంలో తాను ఇచ్చిన డబ్బు వారికి బాగా ఉపయోగపడుతుందనుకుంటున్నానని ఆయన అన్నాడు. జేమ్స్ తమకు చేసిన సాయానికి ఉద్యోగులు చాలా సంతోషించారు.

ఇదిలవుంటే యూకేలో కన్జూమర్ ప్రైసస్ ఇండెక్స్ ద్రవ్యోల్బణం రేటు 6.2 శాతానికి పెరిగింది. సీపీఐ అంటే కొనుగోలు చేసిన వస్తువులు, సేవల ధరలు పెరిగే లేదా తగ్గే రేటు. ఈ సంవత్సరం అది ఇంకా పెరుగుతుందనే అంచనాలు వెలువెడ్డాయి. దీంతోపాటు పన్నులు కూడా పెరగడంతో కార్మికులు బుధవారం నుంచి మరింత ఎక్కువగా నేషనల్ ఇన్సూరెన్స్ చెల్లించాల్సి ఉంటుంది. ఈ బీ 12.5 శాతం నుంచి 13.25 శాతానికి పెరిగింది.