కొత్త టీకాను కొనుగోన్న...అస్ట్రేలియా పరిశోధకులు

కరోనా వివిధ రూపాలు ప్రదర్శిస్తున్న నేపథ్యంలో వాటికి అడ్డుకట్టవేసేదెలా అన్న చర్చలు సాగుతున్నాయి. ఈ నేపథ్యంలోనే మళ్లీ కరోనా కోరలు చాచింది. కొత్త వేరియంట్‌తో మళ్లీ విజృంభిస్తోంది. ఒమిక్రాన్‌ సబ్‌ వేరియంట్‌ ఎక్స్‌ఈ హైబ్రీడ్ వేగంగా వ్యాపిస్తుంది. ఈ వేరియంట్‌ కేసులు బ్రిటన్, చైనాలో ఎక్కువగా నమోదవుతున్నాయి. ఆ వేరియంట్‌కు సంబంధించిన ఓ కేసు ముంబైలో కూడా నమోదవడంతో అందరిలో కలవరం మొదలైంది. ఈ వేరియంట్‌తో ఎలాంటి ముప్పు తెచ్చిపెడుతుందో అనే భయం నెలకొంది. ఈ నేపథ్యంలో ఆస్ట్రియా పరిశోధకులు ఓ శుభవార్త చెప్పారు. ఓ కొత్త టీకాను అభివృద్ధి చేశామని, దాంతో అన్ని రకాల కోవిడ్ వేరియంట్లకు చెక్ పెట్టొచ్చని వెల్లడించారు.

కొత్త వ్యాక్సిన్‌ సమర్థవంతంగా పనిచేస్తున్నట్టు తమ అధ్యయనంలో తేలిందని పరిశోదకులు తెలిపారు. ఈ అధ్యయాన్ని అలెర్జీ జర్నల్‌లో ప్రచురించారు. వారు తయారు చేసిన టీకా ద్వారా ఎలాంటి రోగనిరోధక శక్తి లేని వ్యక్తుల్లో కూడా వైరస్‌‌‌ను ఎదుర్కొనే సామర్త్యం వస్తుందని అధ్యయనంలో తెలిపారు. ఈ టీకాను వియన్నా మెడికల్ యూనివర్సిటీలో అభివృద్ధి చేశారు. ఇది యాంటిజెన్ ఆధారిత వ్యాక్సిన్. దీనిని ఇప్పటికే మానవులు, జంతు నమూనాల్లో పరీక్షలు జరిపారు. ఆ ఫలితాలు సానుకూలంగా వచ్చాయని పరిశోధకులు చెప్పారు. ఈ టీకా వైరస్ రిసెప్టర్ బైండింగ్ డొమైన్‌లను లక్ష్యంగా చేసుకుని పనిచేస్తుందని తెలిపారు.

కరోనాకు సంబంధించిన పాత, కొత్త వేరియంట్ల స్టెరిలైజింగ్ రోగనిరోధక శక్తిని ప్రేరేపించే సామర్థ్యం కొత్త PreS-RBD వ్యాక్సిన్ కలిగి ఉందని ఈ అధ్యయానికి నేతృత్వం వహించిన రుడాల్ఫ్ వాలెంటా తెలిపారు. ఈ టీకా వైరస్ ప్రవేశించడాన్ని, రెప్లికేషన్‌ను నిరోధిస్తుందని, తద్వారా సంక్రమణను అరికడుతుందని ఆయన అన్నారు. దీంతో గతంలో టీకాకు స్పందించని వ్యక్తుల్లో కూడా ఈ వ్యాక్సిన్ ప్రభావవంతంగా పనిచేస్తుందని అంచనా వేస్తున్నారు. ఎందుకంటే టీకా ద్వారా అదనపు టీ సెల్ మద్దతును పొందుతారని పరిశోధకులు అంటున్నారు.

ప్రస్తుతం అందుబాటులో ఉండే టీకాల్లో మెరుగైనదిగా ఇది కనిపిస్తుందని, అన్ని వయస్సులు వారు దీనిని తీసుకోవచ్చని పరిశోధకులు అంటున్నారు. అంతేకాదు తగినంత నిధులు అందుబాటులో ఉంటే ఈ కొత్త టీకా తొలిదశ క్లినికల్ ట్రయల్స్‌‌కు ఈ సంవత్సరంలోనే ఆమోదం లభించవచ్చని తెలిపారు. కాగా రూపం మార్చుకుని దశలవారీగా కరోనా దాడి చేస్తోంది. కొత్త వేరియంట్ ఒమిక్రాన్ కంటే వేగంగా వ్యాప్తి చెందుతుందని వైద్యనిపుణులు చెబుతున్నారు. దీంతో వైద్యులు అప్రమత్తమయ్యారు.