ఎయిడ్స్ వ్యాప్తిపై కేఫ్ ద్వారా అవగాహన కార్యక్రమం

వ్యాపారానికి వ్యాపారం...ఎయిడ్స్ వ్యాధి వ్యాప్తిపై ప్రజలకు అవగాహన ఈ రెండు నెరవేర్చుతోంది ఆ కేఫ్. కోల్‌కతాలో ఎయిడ్స్ బాధితులు ఓ కేఫ్‌ను నడుతున్నారు. హెచ్‌ఐ‌వీ సోకిన ఏడుగురు యువకులు బాలిగంజ్‌ ఏరియాలో ఏర్పాటు చేసిన ఈ కేఫ్ ఎయిడ్స్‌ వ్యాధి గురించి ప్రజల్లో ఉన్న అపోహాలు తొలగించడంతో పాటు, అన్ని వర్గాల ప్రజలను ఆకర్షిస్తుంది. ఈ పాజిటివ్ కేఫ్‌ను 2018లో జోధ్‌పూర్ పార్క్‌లో డాక్టర్ కల్లోల్ ఘోష్ వంద చదరపు అడుగుల గ్యారేజీలో మొదటగా ప్రారంభించారు. అయితే కస్టమర్లు పెరగడంతో ఇటీవల కేఫ్‌ను బాలిగంజ్‌‌కు మార్చారు. ఆసియాలో హెచ్‌ఐవీ బాధితులతో నడపబడుతున్న మొట్టమొదటి కేఫ్ ఇది.

అయితే ఏడుగురు యువకులు డ్రింక్స్, కాఫీ, ఫుడ్‌, చిప్స్‌, శాండ్ విచ్‌లను తయారు చేసి తమ కస్టమర్లకు సర్వ్ చేస్తారు. అయితే అక్కడకొచ్చే చాలామంది కస్టమర్లకు ఆ కేఫ్ హెచ్‌ఐవీ బాధితులతో నడపబడుతుందని తెలియదని డాక్టర్ ఘోష్ తెలిపారు. అయితే ఇతర అంటువ్యాధుల్లా హెచ్‌ఐవీ వ్యాపించదని గుర్తించాలన్నారు. అయితే ఈ కేఫ్‌ను ఏర్పాటు చేయడానికి ఎన్నో అడ్డంకులను దాటాల్సి వచ్చిందని ఘోష్ చెప్పారు. హెచ్‌ఐవీ బాధితులతో నడిపే కేఫ్ ఏర్పాటు చేయడానికి స్థలం దొరకడం చాలా కష్టమైందని, అవగాహన కల్పించడం ద్వారా జోధ్‌పూర్‌లో ఒక వ్యక్తి భవనాన్ని అద్దెకు ఇవ్వడానికి అంగీకరించాడని చెప్పారు.

అక్కడ చుట్టుపక్కల వాళ్లు కేఫ్‌ను వ్యతిరేకించారని, కేఫ్ నుంచి ఉత్పన్నమయ్యే వ్యర్థాలు చుట్టుపక్కల ప్రాంతాల్లో ఎయిడ్స్‌ను వ్యాప్తి చేస్తాయని ఆందోళన చెందారని ఘోష్ చెప్పారు. అయినా వెనక్కి తగ్గకుండా అందరినీ ఒప్పించి కేఫ్ పెట్టామన్నారు. అలాగే ఏడుగురు యువకులు తమ తప్పు లేకుండానే ఎయిడ్స్ బారిన పడ్డారని, వారు కృంగిపోకుండా, తల ఎత్తుకుని జీవించడానికి ఈ కేఫ్ ఎంతగానో దోహదపడిందని అన్నారు.

లాక్‌డౌన్ సమయంలో కేఫ్ మూతబడిందని, ఆ సమయంలో ఏడుగురిని ఓ ఎన్‌జీవో సంస్థ చూసుకుందని ఘోష్ చెప్పారు. అలాగే భవిష్యత్తులో నగరంలోని నాలుగు షాపింగ్‌ మాల్స్‌లో పాజిటివ్‌ కేఫ్‌ అవుట్‌లెట్లను ప్రారంభిస్తున్నామని ఆయన వెల్లడించారు. అలాగే ఏడుగురిలో ఒక్క యువకుడు ఈ కేఫ్‌ని అంగీకరించినందుకు నగరానికి ధన్యవాదాలు తెలిపారు. అలాగే తాము ఇతరులకు భిన్నంగా ఏమి లేమని, మమ్మల్ని అందరిలో భాగంగా చూడాలని ఆకాంక్ష వ్యక్తం చేశాడు.