ఆ మగాళ్లలో సంతానోత్పత్తి తగ్గుతుందటా

కరోనా మిగిల్చిన చేదు అంతా  ఇంతా కాదు. ఇపుడు దీని ప్రభావం ఏకంగా వారసత్వంపై దెబ్బతీస్తోంది. ఇటీవల జరిగిన ఓ రీసెర్చ్ ఫలితాలు దడ పుట్టిస్తున్నాయి. కరోనా బారిన పడి కోలుకున్న మగవాళ్లలో సంతానోత్పత్తి తగ్గుతుందని ఐఐటీ బొంబాయి చేసిన అధ్యయనంలో తేలింది. ఈ స్టడీలో కోవిడ్ నుంచి కోలుకున్న పురుషుల వీర్యంలోని ప్రోటీన్ స్థాయిలను విశ్లేషించారు. దీనిని బట్టి తక్కువ లక్షణాలతో వైరస్ బారిన పడిన పురుషుల సంతానోత్పత్తికి సంబంధించిన ప్రోటీన్లు దెబ్బతింటాయని తెలిసింది. ఈ పరిశోధనకు సంబంధించిన వివరాలను ఏసీఎస్ ఒమెగా జర్నల్ గతవారం ప్రచురించింది.

ఈ స్టడీని ఐఐటీ బొంబాయితో కలిసి జస్లోక్ ఆస్పత్రి, రీసెర్చ్ సెంటర్ పరిశోధకులు సంయుక్తంగా నిర్వహించారు. ఈ అధ్యయనంలో కోవిడ్‌కు కారణమైన సార్స్-2 వైరస్ ప్రధానంగా శ్వాసకోశ వ్యవస్థను ప్రభావితం చేస్తుందని, ఇతర కణజాలాలను కూడా దెబ్బతీస్తుందని పరిశోధనలో తేలింది. ఈ అధ్యయనంలో 20 నుంచి 45 సంవత్సరాల వయస్సు గల పది మంది ఆరోగ్యవంతమైన మగవాళ్ల వీర్యంతో పాటు , కోవిడ్ బారి నుంచి కోలుకున్న మగవాళ్ల వీర్య నమూనాలను విశ్లేషించారు.

అయితే ఆరోగ్యవంతమైన మగవాళ్లలో కంటే కరోనా సోకిన వారిలో వీర్య కణాలు బాగా తగ్గినట్టు పరిశోధకులు గుర్తించారు. సంతానోత్పత్తికి సంబంధించిన రెండు ప్రోటీన్లు సెమెనోజెలిన్ 1, ప్రోసాపోసిన్ కరోనా నుంచి బయటపడినవారిలో తక్కువ స్థాయిలో ఉన్నట్టు పరిశోధకులు చెప్పారు. కోవిడ్ సార్స్ కోవ్ 2 పురుషుల సంతానోత్పత్తి ఆరోగ్యంపై ప్రత్యక్షంగా.. పరోక్షంగా కూడా ప్రభావం వేస్తుందని పరిశోధనలు తెలియజేశాయి. అయితే పరిశోధనలో వెల్లడైన వీటిని నిర్ధారించడానికి లోతుగా అధ్యయనం జరగాలని పరిశోధకులు అన్నారు.