ఇంటర్నేట్ ప్రియులకు బిఎస్ఎన్ఎల్ బంపర్ ఆఫర్లు

నిత్యం సెల్ ఫోన్లో ఉండేవారికి బిఎస్ఎన్ఎల్ బంపర్ ఆఫర్లు తీసుకొస్తోంది. ప్రభుత్వ టెలికం ఆపరేటర్ భారత్‌ సంచార్ నిగమ్ లిమిటెడ్(బిఎస్ఎన్ఎల్)  కొన్ని ఆకర్షణీయమైన ప్రీపెయిడ్ ప్లాన్‌లను అందిస్తోంది. ప్రైవేటు టెలికం సంస్థలతో పోలిస్తే తక్కువ ధరకే.. ఎక్కువ ప్రయోజనాలను ఇస్తోంది. ముఖ్యంగా కొన్ని ప్లాన్‌లతో అధిక వ్యాలిడిటీతో పాటు ఎక్కువ డేటాను బిఎస్ఎన్ఎల్ అందిస్తోంది. ఎక్కువగా డేటా వాడే వారికి ఇవి చాలా ఉపయోగకరంగా ఉంటాయి. ఇలా బిఎస్ఎన్ఎల్ ఇస్తున్న కొన్ని బెస్ట్ ప్లాన్‌లు ఇవే.

బిఎస్ఎన్ఎల్ రూ.599 ప్లాన్‌

రోజులో ఎక్కువ డేటా కావాలనుకునే వారికి ఈ ప్లాన్‌ సూటవుతుంది. బీఎస్ఎన్ఎల్ రూ.599 ప్రీపెయిడ్ ప్లాన్‌ (STV_WFH_599) తో రీచార్జ్ చేసుకుంటే 84 రోజుల వ్యాలిడిటీతో రోజుకు 5జీబీ డేటా లభిస్తుంది. అంటే మొత్తంగా 420జీబీ డేటా పొందవచ్చు. అలాగే ఈ ప్లాన్‌తో అన్‌లిమిడెట్ కాల్స్, రోజుకు 100ఎస్ఎంఎస్‌లు కూడా దక్కుతాయి. దీంతోపాటు వేలాది పాటలు, సినిమాలు, ఇతర ఎంటర్‌టైన్‌మెంట్ కంటెంట్ ఉండే జింగ్ స్ట్రీమింగ్ ప్లాట్‌ఫామ్ సబ్‌స్క్రిప్షన్ కూడా ఉచితంగా లభిస్తుంది. ఇక అర్థరాత్రి 12 గంటల నుంచి తెల్లవారుజామున 5 గంటల వరకు హైస్పీడ్ డేటా అయినా యూజర్లు వాడుకోవచ్చు. ముఖ్యంగా వర్క్ ఫ్రమ్ హోమ్ చేసే వారిని దృష్టిలో ఉంచుకొని బిఎస్ఎన్ఎల్ ఈ ప్లాన్‌ను తీసుకొచ్చింది.

మరోవైపు బిఎస్ఎన్ఎల్ రూ.499 (STV_499) ప్లాన్‌ కూడా మంచి ప్రయోజనాలను ఇస్తోంది. ఈ ప్లాన్‌ తీసుకుంటే 90 రోజుల వ్యాలిడిటీతో రోజుకు 2జీబీ డేటా లభిస్తుంది. అన్‌లిమిటెడ్ కాల్స్, రోజుకు 100ఎస్ఎంఎస్‌లు వినియోగించుకోవచ్చు. అయితే ఈ ప్లాన్‌తో ఏ ఓటీటీ సబ్‌స్క్రిప్షన్ లభించదు.

ఎలాంటి రోజువారి లిమిట్ లేకుండా ఒకేసారి ఎక్కువ డేటా కావాలనుకునే వారికి బిఎస్ఎన్ఎల్ రూ.447 ప్లాన్‌ (STV_447) అందుబాటులో ఉంది. ఈ ప్లాన్‌తో రీచార్జ్ చేసుకుంటే ఒకేసారి 100జీబీ డేటా లభిస్తుంది. వ్యాలిడిటీ 60 రోజులు. 100జీబీ డేటా అయిపోయాక 80కేబీపీఎస్ స్పీడ్‌తో ఇంటర్నెట్ వాడుకోవచ్చు. డేటా వౌచర్‌ విభాగంలో కింద ఈ ప్లాన్‌ లిస్టయింది. అయినా ఈ ప్లాన్‌తో అన్‌లిమిటెడ్ కాల్స్, రోజుకు 100ఎస్ఎంఎస్‌లు కూడా దక్కుతాయి. బీఎస్ఎన్ఎల్ ట్యూన్స్‌తో పాటు ఓటీటీ ప్లాట్‌ఫామ్ ఎరోస్ నౌ సబ్‌స్క్రిప్షన్ కూడా లభిస్తుంది.

డేటా, సుదీర్ఘ వ్యాలిడిటీ కోసం..

కేవలం డేటాతో పాటు ఎక్కువ రోజులు వ్యాలిడిటీ ప్లాన్‌ కావాలనుకునే వారికి బిఎస్ఎన్ఎల్ రూ.1498 ప్లాన్‌ సూటవుతుంది. ఈ ప్లాన్‌తో రీచార్జ్ చేసుకుంటే ఏకంగా సంవత్సరం పాటు అంటే 365 రోజుల వ్యాలిడిటీతో రోజుకు 2జీబీ డేటా దక్కుతుంది. అయితే కాల్స్, ఎస్ఎంఎస్ ప్రయోజనాలు ఉండవు. అయితే ప్రస్తుతం బిఎస్ఎన్ఎల్ 3జీ సేవలను మాత్రమే అందిస్తోంది. ఆగస్టులో 4జీ నెట్‌వర్క్ ప్రారంభమయ్యే అవకాశం ఉంది.