యూపీలో...బుల్డోజర్ బాబా టీ స్టాల్‌

సహజంగా ప్రజలు సినిమాలను ఫాలో అవుతూ తమ వ్యాపారాలకు పేర్లు పెడుతుంటారు. కానీ యూపీలో మాత్రం అందుకు బిన్నంగా యోగి బాబా పేరుతో వ్యాపారాలు చేసేస్తున్నారు. ఉత్తర ప్రదేశ్‌లో సీఎం యోగి ఆదిత్యనాథ్ కారణంగా బుల్డోజర్ బాగా పాపులర్ అయిపోయింది. దాంతో ఆయన్ని అక్కడి ప్రజలు బుల్డోజర్ బాబాగా కూడా పిలుచుకుంటున్నారు. యోగి ప్రభుత్వం బుల్డోజర్‌తో ల్యాండ్ మాఫియాకి, అవినీతికి చెక్ పెట్టారు. ఈ కారణంగా ప్రజల్లో ఆయనపై నమ్మకం ఏర్పడింది. దాంతో యోగి ఆదిత్యనాథ్ రెండోసారి అధికార పగ్గాలను చేపట్టారు. కొంతకాలం క్రితం జరిగిన అసెంబ్లీ ఎన్నికల్లో యోగి అత్యధిక మెజార్టీ ఓట్లతో గెలుపొందారు. అంతగా యోగిని ప్రజలు అభిమానిస్తున్నారు.

యోగిపై ఉన్న గౌరవంతో వారణాసిలో ఓ వ్యక్తి ఏకంగా తన టీస్టాల్ పేరును కూడా మార్చుకున్నాడు. బుల్డోజర్ బాబా టీ స్టాల్‌గా మార్చేశాడు. యోగి ఆదిత్య నాథ్ పని చేసే విధానం తమకెంతో నచ్చిందని, అందుకే తమ టీ స్టాల్‌కు ఆయన పేరు పెట్టుకున్నామని రామ్ సూరత్ యాదవ్, అతని కొడుకు చంద్రేశ్ యాదవ్ చెప్పారు. ముఖ్యమంత్రిని తాము ఎంతగానో అభిమానిస్తున్నామని చెప్పారు. యూపీలో యోగి ఆదిత్యనాథ్ రెండోసారి ముఖ్యమంత్రిగా ప్రమాణ స్వీకారం చేసిన రోజునే టీ స్టాల్‌కి పేరు మార్చామని వారు చెప్పారు. అలాగే ఆ టీ స్టాల్‌లో లస్సీలను కూడా విక్రయిస్తున్నారు. దానికి గోశాల లస్సీ భండార్ అని పేరు పెట్టారు. వారి టీ రుచి గురించి చెబుతూ బుల్డోజర్‌లాగానే మంచి కిక్ ఇస్తుందన్నారు.

ప్రస్తుతం యూపీలో బుల్డోజర్ క్రేజ్ ఎక్కువగా ఉంది. గతంలో ప్రయాగ్‌రాజ్‌లో జరిగిన ఓ సామూహిక వివాహ వేడుకలో ఒక్కటైన జంటలకు బుల్డోజర్ బొమ్మలను గిఫ్ట్‌లు అందజేశారు. తొమ్మిది జంటలకు బుల్డోజర్ నమూనాలను అందజేశారు. ఈ సందర్భంగా రాష్ట్రంలో మహిళలకు రక్షణ ఉందని, అవినీతి జరిగితే యోగి ప్రభుత్వం ఊరుకోదని, దానికి ప్రతీకగానే బుల్డోజర్‌‌ బొమ్మలను అందజేశామని సంబంధిత నిర్వాహకులు వెల్లడించారు. యూపీ అసెంబ్లీ ఎన్నికల్లో కూడా బుల్డోజర్లపై యోగి కామెంట్లు చాలా ఫేమస్ అయ్యాయి.