కేస సంరక్షణ చిట్కాలు...
Health beauty | Suryaa Desk | Published : Wed, Apr 13, 2022, 09:06 PM
ఈ రోజుల్లో జుట్టు రాలడం అన్నది కామన్ సమస్య. తీసుకునే ఆహారం, వర్క్ టెన్షన్లు, విశ్రాంతి లేకపోవడం ఇలా ఎన్నో కారణాలు జుట్టు ఊడిపోయేలా చేస్తున్నాయి. జుట్టు రాలకుండా ఉండేందుకు ఏం చెయ్యాలా అని రకరకాల షాంపూలూ, క్రీములూ వాడటం వల్ల సమస్య పెరుగుతుందే తప్ప తగిన పరిష్కారం దొరకదు. జుట్టు రాలకుండా ఉండటానికి కొన్ని సహజ పద్ధతులున్నాయి. వాటిని పాటిస్తే ఎక్కువ ప్రయోజనాలు కలుగుతాయి. వాటిలో కొన్నిటిని ఇప్పుడు తెలుసుకుందామా...
-- విటమిన్ ఇ ఎక్కువగా ఉండే నువ్వులనూనెను తలకు బాగా పట్టించి, కాసేపటి తర్వాత గోరు వెచ్చని నీటితో స్నానం చేస్తే క్రమంగా జుట్టు ఊడడం తగ్గుతుంది.
--మందార ఆకులను మెత్తగా నూరి, తలకు బాగా పట్టించి కాసేపటి తర్వాత తలస్నానం చేస్తే కూడా జుట్టు ఊడడం తగ్గుతుంది.
--మందార పువ్వులను, కొబ్బరినూనె లేక నువ్వుల నూనెలో వేసి కాచి, ఆ నూనెను వెంట్రుకలకు పట్టించి ఒక గంట తర్వాత కుంకుడు రసంతో స్నానం చేస్తే జుట్టు రాలటం తగ్గుతుంది.
--ఉసిరి రసం తీసి తలకి రాస్తే వెంట్రుకలు ఊడడం తగ్గి, జుట్టు ఒత్తుగా పెరుగుతుంది.
--రెండు టేబుల్ స్పూన్ల కొబ్బరి నూనెలో ఒక టీ స్పూన్ ఉల్లిరసం మిక్స్ చేసి ఆ మిశ్రమాన్ని మాడుకు పట్టించాలి. ఒక అరగంట తర్వాత నీటితో శుభ్రం చేసుకోవాలి. ఇలా తరచూ చేస్తుంటే హెయిర్ ఫాల్ తగ్గి, బాగా పెరుగుతుంది.
|
|