భారీగా పెరిగిన ధరల ఎఫెక్ట్...పెట్రోల్, డీజీల్, గ్యాస్ వినియోగం తగ్గింది

ధరలు పెరిగితే సర్థుకుపోతం అన్న భారతీయుల ధోరణీ మరోసారి స్పష్టంగా కనిపించింది. భారత్‌లో ఫ్యూయెల్ అమ్మకాలు భారీగా తగ్గాయి. ఏప్రిల్ నెల తొలి అర్ధ భాగంలో పెట్రోల్, డీజిల్ అమ్మకాలు క్షీణించాయి. అధిక ఇంధన ధరలు ఇందుకు ప్రధాన కారణం. ధరలు ఆకాశాన్ని తాకడంతో డిమాండ్ పడిపోయింది. దీంతో అమ్మకాల్లో తగ్గుదల నమోదు అయ్యింది. గత నెల తొలి అర్ధ భాగంతో పోలిస్తే ఈ నెల తొలి 15 రోజుల్లో పెట్రోల్ అమ్మకాలు దాదాపు 10 శాతం మేర తగ్గాయి. ఇక డీజిల్ అమ్మకాలు అయితే ఏకంగా 15.6 శాతం మేర క్షీణించాయి. ఆఖరికి ఎల్‌‌పీజీ గ్యాస్ డిమాండ్ కూడా తగ్గిందంటే మీరే అర్థం చేసుకోండి. ధరల ప్రభావం ప్రజలపై ఏ స్థాయిలో ఉందో. కరోనా వైరస్ ప్రతికూల పరిస్థితులలోనూ ఎల్‌పీజీ గ్యాస్ సిలిండర్ డిమాండ్ పెరుగుతూనే వచ్చింది. అయితే ఇప్పుడు మాత్రం కుకింగ్ గ్యాస్‌లో 1.7 శాతం క్షీణత కనిపించింది.

ప్రభుత్వ రంగ ఆయిల్ కంపెనీలు మార్చి 22న పెట్రోల్, డీజిల్ ధరల బాదుడును ప్రారంభించాయి. దీనికి ముందు 137 రోజులు ఇంధన ధరల్లో మార్పు లేదు. స్థిరంగానే కొనసాగుతూ వచ్చాయి. ఈ కాలంలో బ్యారెల్ క్రూడ్ ధర 30 డాలర్ల మేర పెరిగింది. దీంతో ఎన్నికలు ముగియగానే కంపెనీలు ఈ భారాన్ని వినియోగదారులకు బదిలీ చేశాయి. దీంతో ధరలు ఒక్కసారిగా పెరిగిపోయాయి. మార్చి 22 నుంచి ఏప్రిల్ 6 మధ్యలో పెట్రోల్, డీజిల్ ధరలు లీటరుకు రూ.10 మేర పెరిగాయి. గత రెండు దశాబ్ద కాలంలో చూస్తే 16 రోజుల్లో ధరలు ఈ స్థాయిలో పెరగడం ఇదే తొలిసారి కావడం గమనార్హం. మార్చి 22న వంట గ్యాస్ ధర కూడా రూ.50 మేర పెరిగింది. దీంతో రేటు రూ.950కు చేరింది. సబ్సిడీ వంట గ్యాస్ ధర ఈస్థాయి చేరడం ఇదే తొలిసారి.

జెట్ ఫ్యూయెల్ రేట్లు కూడా భారీగా పెరిగాయి. కిలో లీటరు ధర రూ.1,13,202 స్థాయికి చేరింది. దీంతో జెట్ ఫ్యూయెల్ అమ్మకాలు నెల వారీగా చూస్తే ఏకంగా 20.5 శాతం మేర తగ్గాయి. మార్చి నెల తొలి రెండు వారాల కాలంలో డీలర్లు స్టాక్‌ను ఫుల్ చేసి పెట్టుకున్నారు. ప్రజలు వారి వాహనాల ట్యాంకులను ఫుల్ చేసుకున్నారు. ధరలు పెరుగుతాయనే అంచనాలు ఇందుకు కారణం. తర్వాత ఇదే జరిగింది.

ప్రభుత్వ రంగ రిటైలర్ల పెట్రోల్ అమ్మకాలు ఏప్రిల్ 1 నుంచి 15 వరకు 1.12 మిలియన్ టన్నులుగా ఉన్నాయి. గత ఏడాదితో పోలిస్తే ఈ అమ్మకాలు 12.1 శాతం ఎక్కువ. 2019 ఇదే కాలంలో పోలిస్తే ఈ అమ్మకాలు 19.6 శాతం ఎక్కువ అని చెప్పుకోవాలి. అయితే వినియోగం మాత్రం మార్చి నెల 1 నుంచి 15 వరకు కాలంతో పోలిస్తే ఇప్పుడు 9.7 శాతం తగ్గింది. 1.24 మిలియన్ టన్నులుగా నమోదు అయ్యింది. డీజిల్ అమ్మకాలు కూడా 15.6 శాతం క్షీణతతో 3.53 మిలియన్ టన్నులకు తగ్గాయి. మొత్తానికి ధరల పెరుగుదల వల్ల ప్రజలు వాహనాలను బయటకు తియ్యడానికి వణుకుతున్నారని చెప్పుకోవచ్చు.