విదేశాల్లో స్థిరపడాలనే ఆశతో...దొంగగా మారాడు

కొందరు జీవించడానికి దొంగగా మారితే..మరికొందరు విలాసవంతమైన జీవితం కోసం దొంగగా మారుతారు. కానీ ఇతనో వింత దొంగగా మారాడు. సాధ్యమైనని దొంగతనాలు చేసి, ఆ సొమ్ముతో యూరప్‌లో వెళ్లి స్థిరపడిపోవాలని భావించిన ఓ ముఠా ఆశలకు గండిపడింది. విలాసవంతమైన జీవితాన్ని గడిపేందుకు దొంగతనాలనే వృత్తిగా చేసుకున్న ముగ్గురు యువకులను కర్ణాటక పోలీసులు అదుపులోకి తీసుకున్నారు. వారి నుంచి రూ.1.10 కోట్ల విలువ చేసే బంగారు, వెండి ఆభరణాలు, ఇతర ఖరీదైన వస్తువులను స్వాధీనం చేసుకున్నారు. పోలీసులు తెలిపిన వివరాల ప్రకారం.. హైదరాబాద్‌‌కు చెంది వినోద్‌ కుమార్‌ అలియాస్ షరీఫ్ (25), బెంగాల్‌కు చెందిన రోహిత్‌ మండల్‌ (26), తమిళనాడుకు చెందిన ఇసైరాజ్‌ (27) ముగ్గురూ స్నేహితులు ముఠాగా ఏర్పడి దొంగతనాలకు పాల్పడ్డారు.

గత నెల బెంగళూరులో సంజయ్‌నగరలోని ఓ ఇంట్లో చోరీ జరిగింది. ఈ కేసులో ఇసై రాజ్‌ పట్టుబడగా.. విచారణ సమయంలో అతడు ఇచ్చిన సమాచారంతో దొంగతనాల చిట్టా బయటపడింది. సంజయ్‌నగర చోరీ సొత్తు రూ.30.87 లక్షల విలువ చేసే నగలు, వస్తువులను స్వాధీనం చేసుకున్నారు. తర్వాత వినోద్, రోహిత్‌లను అదుపులోకి తీసుకుని విచారించారు. ముగ్గురూ మొత్తం 19 దొంగతనాలకు పాల్పడినట్టు తేలింది.

హైదరాబాద్‌లో ఉన్నప్పుడు ఇళ్లలో దొంగతనాలకు పాల్పడిన కేసులో అరెస్టయిన వినోద్.. 2015లో బెయిల్‌పై బయటకు వచ్చాడు. అతడి నేరప్రవృత్తితో విసిగిపోయిన కుటుంబం దూరం పెట్టింది. దీంతో 2016లో కోల్‌కత్తాకు వెళ్లి అక్కడ డ్రైవర్‌గా చేరాడు. ఈ క్రమంలో రోహిత్‌, ఇసై రాజ్‌తో స్నేహం ఏర్పడింది. అయితే, ఓ బంగ్లాదేశ్‌ యువతితో వినోద్‌కు పరిచయం ఏర్పడి ప్రేమకు దారితీసింది. దీంతో మిత్రులను వెంటబెట్టుకుని బంగ్లాదేశ్‌కు వెళ్లాడు. అక్కడ వెళ్లిన తర్వాత ఇబ్బందులు ఎదుర్కొవడంతో తిరిగి భారతదేశానికి వచ్చేశారు.

దొంగతనాల గురించి యూట్యూబ్‌లో వీడియోలు పరిశీలించి.. బెంగళూరుకు మకాం మార్చారు. అక్కడ తాళాలు వేసిన ఇళ్లను గుర్తించి దొంగతనాలు చేయడం మొదలు పెట్టారు. దొంగిలించిన సొత్తును విక్రయించి, ఆ డబ్బుతో విలాసవంతమైన జీవితం గడిపారు. అయితే, త్వరలో విదేశాలకు వెళ్లి అక్కడ స్థిరపడాలని పథకం వేశారు. ఇందుకు అవసరమైన ఏర్పాట్లు చేసుకున్నట్లు విచారణలో వెల్లడయ్యింది. నిందితుల అరెస్టుతో మొత్తం 35 నేరాల వివరాలు వెలుగులోకి వచ్చినట్లు వివరించారు.