భానుడు కన్నేరజేస్తే ఏమవుతుందో తెలుసా

భానుడు ప్రకాశించాడు అని మనం వింటుంటాం. కానీ అదే కన్నేరజేస్తే ఎలా ఉంటుందో తెలుసా..? ఇలా ఉంటుంది. గత బుధవారం ఉదయం 9.27 నిమిషాలకు భానుడు ఒక్కసారిగా నిప్పులు కురిపించాడు. సమాచార ఉపగ్రహాలు, జీపీఎస్‌ వ్యవస్థలు దెబ్బతినే స్థాయిలో ఈ కిరణాలు నమోదైనట్టు కోల్‌కతా‌లోని సెంటర్‌ ఫర్‌ ఎక్సలెన్స్‌ ఇన్‌ స్పేస్‌ సైన్సెస్‌ ఇండియా (సెస్సీ) వెల్లడించింది. జియో-మాగ్నటిక్ క్రియాశీలక ప్రాంతమైన ఏఆర్‌-12992 నుంచి ఎక్స్‌-2.2 శ్రేణి సౌరజ్వాలలు వెలువడినట్టు తెలిపింది. భారత్‌, ఆగ్నేయాసియా, ఆసియా పసిఫిక్‌ ప్రాంతంలో వీటి ప్రభావం స్పష్టంగా కనిపించినట్టు సెస్సీ నిపుణులు గుర్తించారు. సూర్యుడి జ్వాలలు కారణంగా హై-ఫ్రీక్వెన్సీ కమ్యూనికేషన్‌ వ్యవస్థలు స్తంభించడం, ఉపగ్రహాలు, జీపీఎస్‌ పనితీరులో లోపాలు తలెత్తాయి. అలాగే, ఎయిర్‌లైన్స్‌ కమ్యూనికేషన్‌ వ్యవస్థలు కూడా ప్రభావితం కావచ్చని సెస్సీ కో-ఆర్డినేటర్, ఇండియన్‌ ఇన్‌స్టిట్యూట్‌ ఆఫ్‌ సైన్స్‌ ఎడ్యుకేషన్‌ అండ్‌ రిసెర్చ్‌ (ఐఐఎస్ఈఆర్) అసోసియేట్‌ ప్రొఫెసర్‌ దివ్యేందు నంది పేర్కొన్నారు.

సౌరజ్వాలల ప్రభావాన్ని అంచనా వేసేందుకు తమ బృందం ప్రయత్నిస్తున్నట్టు ఆయన తెలిపారు. ‘‘భారత్, ఆగ్నేయాసియా, ఆసియా-పసిఫిక్ ప్రాంతాలపై బలమైన అయానోస్పిరిక్ ప్రకంపనలు కొనసాగుతున్నాయి.. ఊహించిన అధిక ఫ్రీక్వెన్సీ కమ్యూనికేషన్ బ్లాక్‌అవుట్‌లు, సమాచార ఉపగ్రహాలు, జీపీఎస్ స్కింటిలేషన్‌లు, ఎయిర్‌లైన్ కమ్యూనికేషన్‌పై ప్రభావం చూపాయి’’ అని సెస్సీ ట్విట్టర్‌లో తెలిపింది.

సౌర వ్యవస్థ నుంచి ఒక్కసారిగా శక్తి విడుదల కావడాన్ని సౌరజ్వాలలు (సోలార్‌ ఫ్లేర్స్)గా పేర్కొంటారు. వీటి ప్రభావం రేడియా, నేవిగేషన్‌ సంకేతాలతో పాటు ఒక్కోసారి విద్యుత్‌ గ్రిడ్‌లపై కూడా ఉంటుంది. తత్ఫలితంగా విమానాలు, వ్యోమనౌకలు, వ్యోమగాములకూ ముప్పు ఏర్పడే అవకాశం ఉంది. బలమైన సౌరజ్వాలలు గురించి దివ్యేందు బృందం ఏప్రిల్‌ 18నే అంచనా వేసింది.

భూకంపాల మాదిరే సౌరజ్వాలల తీవ్రతనూ నాసా వర్గీకరించింది. ఏ నుంచి మొదలుపెట్టి బీ, సీ, ఎం, ఎక్స్‌ వంటి తరగతులుగా విభించింది. భూకంపాలకు సంబంధించిన రిక్టర్ స్కేల్ మాదిరిగానే ప్రతి అక్షరం శక్తి ఉత్పత్తిలో 10 రెట్లు పెరుగుదలను సూచిస్తుంది. బుధవారం నాటి జ్వాలలను అన్నింటికన్నా తీవ్రమైన ‘ఎక్స్‌’ తరగతిగా భావిస్తున్నారు. ఇవి ‘ఎం’ తరగతి సౌరజ్వాలల కన్నా పది రెట్లు, ‘సీ’ తరగతి కన్నా వంద రెట్లు తీవ్రతతో ఉంటాయి.