కేరళను వణికిస్తున్న 'టమోటా ఫీవర్'

ఇప్పటికే రోజువారీ కరోనా కేసులు అధిక మొత్తంలో నమోదవుతున్న కేరళను కొత్త వ్యాధులు వెంటాడుతున్నాయి. తాజాగా ఆ రాష్ట్రాన్ని మరో ఫ్లూ వణికిస్తోంది. ఐదేళ్ల కంటే తక్కువ వయసు ఉన్న 80 మంది పిల్లలు 'టమోటా ఫ్లూ' అని పిలిచే అరుదైన వైరల్ ఇన్ఫెక్షన్‌తో బాధపడుతున్నారు. కేరళలోని కొల్లాం ప్రాంతంలో 82 కేసుల నిర్ధారణ అయ్యాయి. ధృవీకరించబడిన కేసులన్నీ ప్రభుత్వ ఆసుపత్రుల నుండి నివేదించబడ్డాయని తెలుస్తోంది. ప్రైవేట్ ఆసుపత్రుల నుండి వచ్చిన కేసులను కలుపుకుంటే సంఖ్య ఎక్కువగా ఉండవచ్చనే అభిప్రాయాలున్నాయి. కేరళలో ఈ కొత్త ఫ్లూ కారణంగా తమిళనాడు ప్రభుత్వం అప్రమత్తమైంది. సరిహద్దుల్లో తనిఖీలు ముమ్మరం చేస్తున్నారు.

టమోటా ఫ్లూ సాధారణ రకమైన జ్వరంగా భావిస్తారు. ఐదేళ్ల కంటే తక్కువ వయసున్న పిల్లలలో ఈ జ్వరం సోకుతుంది. ఈ వ్యాధి వచ్చిన పిల్లల శరీరంపై దద్దుర్లు, చర్మంపై దురద, చర్మం పొడిబారిపోవడం వంటివి కనిపిస్తాయి. శరీరంలోని అనేక భాగాలపై ఎరుపు రంగులో బొబ్బలు ఏర్పడతాయి. అందుకే దీనిని టమోటా ఫ్లూ అని పిలుస్తున్నారు. అంతేకాకుండా అలసట, కీళ్ల నొప్పులు, పొత్తికడుపు తిమ్మిరి, వికారం, వాంతులు లేదా అతిసారం, దగ్గు, తుమ్ము, గురక, లేదా ముక్కు కారడం, తీవ్ర జ్వరం, ఒళ్లునొప్పులు వంటి లక్షణాలుంటాయి. కొల్లాంలోని కొన్ని ప్రాంతాలలో మాత్రమే ఈ రకమైన ఫ్లూ బారిన పడుతున్నారు. అయితే నివారణ చర్యలు తీసుకోకపోతే ఇతర ప్రాంతాలకు కూడా ఇది వ్యాపించే అవకాశం ఉందని ఆరోగ్య అధికారులు హెచ్చరించారు.

వైరస్ ప్రాణాంతకం కాదని, చికిత్స చేయవచ్చని ఆరోగ్య అధికారులు చెబుతున్నారు. ఈ వైరస్‌ను నిరోధించడానికి కొన్ని పనులు తప్పక చేయాలన్నారు. దురద పుట్టిస్తున్న బొబ్బలు గీసుకోవద్దని సూచిస్తున్నారు. కాచిన నీటిని తాగాలని, పరిశుభ్రత పాటించాలని, వ్యాధి సోకిన వ్యక్తికి దూరంగా ఉండాలని పేర్కొంటున్నారు. వ్యాధి సోకిన వారు గోరు వెచ్చని నీటితో స్నానం చేయాలని, వ్యాధి దీర్ఘకాలిక ప్రభావాన్ని నివారించడానికి సరైన విశ్రాంతి తీసుకోవాలని చెబుతున్నారు.