రష్యాపై కెనడా కన్నెర్ర... రష్యన్ల పై నిషేధం విధిస్తూ నిర్ణయం

ఉక్రెయిన్‌పై దాడికి దిగిన రష్యాపై అనేక దేశాలు ఆంక్షలు పెట్టాయి. అమెరికా, నాటో దేశాలు సైతం రష్యాపై ఆర్థికపరమైన, వాణిజ్యపరమైన నిబంధనలతో ఉచ్చు బించాయి. ఇందులో కెనడా కూడా భాగమైంది. అయినా రష్యా తన పంథాను మార్చుకోలేదు. పైగా రష్యా ట్రూడోతో పాటు సుమారు 600 మంది కెనడా ప్రముఖులపై నిషేధం విధించింది. అందులో భాగంగా కెనడా కూడా పుతిన్‌కు కౌంటర్ అటాక్ చేసినట్టు తెలుస్తుంది. ఇదిలా ఉంటే గత కొన్ని రోజుల క్రితం కెనడా ప్రధాని జస్టిస్ ట్రూడో ఉక్రెయిన్‌లోని ఇర్విన్‌లో పర్యటించారు. ఉక్రెయిన్ అధ్యక్షుడుతో సమావేశమై తమ మద్దతును ప్రకటించారు.

ఈ క్రమంలో కెనడా ప్రభుత్వం ఈ సంచలన నిర్ణయం తీసుకుంది. రష్యా అధ్యక్షుడు వ్లాదిమిర్ పుతిన్‌‌పై నిషేధం విధించింది. పుతిన్‌తో పాటు మరో వెయ్యిమంది రష్యన్ పౌరులకు తమ దేశంలో ప్రవేశంపై నిషేధాన్ని ప్రకటించింది. ఈ విషయాన్ని మంత్రి మార్కో మెండిసినో మంగళవారం తెలిపారు. ఉక్రెయిన్‌పై రష్యా దాడి నేపథ్యంలో కెనడా ప్రభుత్వం ఈ నిర్ణయం తీసుకుంది.

ఉక్రెయిన్‌పై రష్యా చేస్తున్న సమరాన్ని దృష్టిలో పెట్టుకుని పుతిన్ ఎంట్రీ నిషేధంపై కెనడా ప్రభుత్వం ప్రత్యేక బిల్లును ప్రవేశపెట్టి.. మరీ ఆమోదం తెలిపింది. దీంతో కెనడా కూడా ఉక్రెయిన్‌కు మద్దతుగా నిలిచింది. ఇదే విషయాన్ని మంత్రి మార్కో మెండిసినో వెల్లడించారు. "పుతిన్ క్రూరమైన దాడి నేపథ్యంలో కెనడా ఉక్రెయిన్‌కు అండగా నిలుస్తుంది. మేము దాని నేరాలకు రష్యాను బాధ్యులను చేస్తాం. అందుకే మేము పుతిన్‌పై, వెయ్యి మంది రష్యన్లను కెనడాలోకి ప్రవేశించకుండా నిషేధిస్తున్నట్టు ప్రకటించాం." అని మార్కో మెండిసినో చెప్పారు.