బుకర్‌ ప్రైజ్‌ వస్తుందని కలలో కూడా ఊహించలేదు

బుకర్‌ ప్రైజ్‌ వస్తుందని తాను కలలో కూడా ఊహించలేదని అన్నారు. ఈ పురస్కారాన్ని తాను గొప్ప గౌరవంగా తాను భావిస్తానని భారతీయ రచయిత్రి గీతాంజలిశ్రీ అన్నారు. ఇదిలావుంటే సాహిత్యంలో ప్రతిష్ఠాత్మక బుకర్ ప్రైజ్‌‌ 2022ను భారతీయ రచయిత్రి గీతాంజలిశ్రీ గెలుచుకున్నారు. ఆమె రాసిన ‘టూంబ్ ఆఫ్‌ శాండ్‌’ అనే హిందీ అనువాద నవలకు ఈ పురస్కారం దక్కింది. అంతేకాదు, భారతీయ భాషల్లో రాసిన పుస్తకానికి ‘బుకర్‌ ’పురస్కారం లభించిన మొదటి నవలగా రికార్డులకెక్కింది. హిందీలో ‘రేత్‌ సమాధి’ పేరుతో 2018లో గీతాంజలి రాసిన నవలను.. డైసీ రాక్‌వెల్‌ అనే బ్రిటిష్ రచయిత్రి ఇంగ్లీషులోకి ‘టూంబ్ ఆఫ్‌ శాండ్‌’ పేరుతో అనువాదం చేశారు. దీంతో ఇరువురికీ సంయుక్తంగా ఈ పురస్కారం దక్కింది.

గురువారం జరిగిన బుకర్ వేడుకల్లో డైసీతో కలిసి గీతాంజలి ఈ అవార్డును అందుకున్నారు. అవార్డు కింద లభించిన 50 వేల పౌండ్ల నగదును ఇద్దరూ చెరిసగం పంచుకున్నారు. పురస్కారాన్ని అందుకున్న గీతాంజలి భావోద్వేగానికి గురయ్యారు. ఈ సందర్భంగా ఆమె మాట్లాడుతూ.. బుకర్‌ ప్రైజ్‌ వస్తుందని తాను కలలో కూడా ఊహించలేదని అన్నారు. ఈ పురస్కారాన్ని తాను గొప్ప గౌరవంగా తాను భావిస్తానని అన్నారు. ఉత్తర్ ప్రదేశ్‌లోని మైన్‌పూర్‌లో జన్మించిన గీతాంజలి.. ప్రస్తుతం ఢిల్లీలో నివసిస్తున్నారు.

ఇప్పటి వరకూ మూడు నవలలు.. పలు కథా సంకలనాలను ఆమె ప్రచురించారు. వీటిలో చాలా రచనలు ఇంగ్లిష్‌, ఫ్రెంచ్‌, జర్మన్, కొరియా భాషల్లోకి అనువాదమయ్యాయి. బుకర్ ప్రైజ్‌కు ఎంపికైన ‘రేత్‌ సమాధి’ నవల ఉత్తర భారత్‌కు చెందిన ఓ 80 ఏళ్ల వృద్ధురాలి చుట్టూ తిరుగుతుంది. భర్త మరణంతో తీవ్ర నిరాశానిస్పృహలోకి వెళ్లిపోయిన ఆమె.. దానిని నుంచి బయటపడి తనకు ఎదురైన ప్రతికూల పరిస్థితులను అధిగమించి కొత్త జీవితాన్ని ప్రారంభించేందుకు ఎలా ప్రయత్నిస్తుందో ఈ నవల వివరిస్తుంది.

ఈ క్రమంలోనే దేశ విభజన సమయంలో వదిలి వచ్చిన గతాన్ని వెతుక్కుంటూ పాకిస్థాన్‌కు వెళ్లాలని ఆమె నిర్ణయించుకుంటుంది. ఈ ప్రయాణాన్ని రచయిత్రి వర్ణించిన తీరును న్యాయనిర్ణేతలు ఎంతగానో ప్రశంసించారు. ఇదిలావుంటే ఇప్పటి వరకూ భారతీయ సంతతికి చెందిన సల్మాన్ రష్దీ, కిరణ్ దేశాయ్, అరుంధతి రాయ్, అరవింద్ అడిగలు బుకర్ ప్రైజ్‌ను గెలుచుకున్నారు.