ఆ వార్తల్లో వాస్తవం లేదు: రష్యా విదేశాంగ మంత్రి వెల్లడి

పుతిన్ ఆరోగ్యంపై వందతులు తారాస్థాయికి చేరడంతో రష్యా విదేశాంగ మంత్రి సెర్గీ లావ్రోవ్‌ ఘాటుగా స్పందించారు. అధ్యక్షుడి ఆరోగ్యంపై తప్పుడు ప్రచారం చేస్తున్నారని, ఆ కథనాలన్నీ ఉత్త ప్రచారమేనని ఖండించారు. ఇదిలావుంటే  ఉక్రెయిన్‌పై రష్యా దండయాత్ర మొదలైనప్పటి నుంచి మాస్కో అధినేత వ్లాదిమిర్ పుతిన్ ఆరోగ్యం గురించి అంతర్జాతీయ మీడియాలో పలు కథనాలు వెలువడుతున్నాయి. ఆయన కేన్సర్‌తో బాధపడుతున్నారని సర్జరీ కూడా చేయించుకున్నారనే పుకార్లు షికార్లు చేస్తున్నాయి. అంతేకాదు, పుతిన్‌‌కు పార్కిన్సన్స్ వ్యాధి ఉందంటూ పాశ్చాత్య దేశాలు, పలు మీడియాలు హడావిడి చేస్తూనే ఉన్నాయి. అయితే, పుతిన్ ఆరోగ్యం పరిస్థితి గురించి ఎటువంటి అధికారిక ప్రకటన లేకపోయినా తరచూ ఏదో కొత్త విషయం బయటకు వస్తూనే ఉంది. తాజాగా, పుతిన్‌ జీవితకాలం గురించి సంచలన కథనం వెలువడింది.

పుతిన్‌‌కు కేన్సర్ ముదిరిపోయిందని, దీంతో ఆరోగ్యం క్షీణిస్తోందని ఓ కథనం వెలువరించిన ది ఇండిపెండెంట్ పత్రిక.. ఈ విషయాన్ని రష్యా నిఘా అధికారి చెప్పినట్టు పేర్కొంది. పుతిన్ ఆరోగ్యంపై రష్యన్ ఫెడరల్ సెక్యూరిటీ సర్వీసెస్ అధికారి బోరిస్‌ కార్పిచ్కోవ్‌ తాజాగా ఓ ప్రకటన విడుదల చేసినట్లు తెలిపింది. కేన్సర్‌తో బాధపడుతున్న వ్లాదిమిర్‌ పుతిన్‌ మరో మూడేళ్లు మాత్రమే బతుకుతారని వైద్యులు తెలిపినట్లు ఆయన ప్రకటనలో ఉంది.

‘‘పుతిన్‌ ఆరోగ్య పరిస్థితి రోజు రోజుకూ క్షీణిస్తోందని, రెండు మూడేళ్లు మాత్రమే బతుకుతారని వైద్యులు చెబుతున్నారు, పుతిన్‌ క్రమంగా కంటిచూపు కూడా కోల్పోతున్నారు, తీవ్ర తలనొప్పితో బాధపడుతున్నారు.. పుతిన్‌ కంటిచూపు తగ్గుతుండటంతో కళ్లజోడు ధరించడానికి ఇష్టపడకపోవడంతో లైవ్‌లో మాట్లాడేటప్పుడు ప్రసంగాలను పెద్ద అక్షరాలతో రాసి ఇస్తున్నారు, దృష్టిలోపం ఉన్నట్లు ఒప్పుకోవడం పుతిన్‌కు ఇష్టం లేదు. కాళ్లుచేతులు వణకడం సమస్య పెరిగిపోయింది’’ అని కార్పిచ్కోవ్ వివరించారు.

అంతేకాదు, తన వ్యక్తిగత సిబ్బంది, అధికారులపై అసహనం ప్రదర్శిస్తున్నారని, విపరీతమైన చిరాకుతో మాట్లాడుతున్నారని చెప్పారు. బ్రిటన్ ఇంటెలిజెంట్‌ అధికారి క్రిస్టోఫర్‌ స్టీల్‌ కూడా పుతిన్‌ ఆరోగ్యం ఆందోళనకరంగానే ఉందని వ్యాఖ్యానించారు. సమావేశాల మధ్యలోనే పుతిన్ వెళ్లిపోతున్నాడని, ఆయన పరిస్థితి నానాటికీ దిగజారుతోంది అనడానికి ఇదే నిదర్శనమని క్రిస్టోఫర్‌ అన్నారు. ఇదిలావుంటే  పుతిన్ ఆరోగ్యంపై వందతులు తారాస్థాయికి చేరడంతో రష్యా విదేశాంగ మంత్రి సెర్గీ లావ్రోవ్‌ ఘాటుగా స్పందించారు. అధ్యక్షుడి ఆరోగ్యంపై తప్పుడు ప్రచారం చేస్తున్నారని, ఆ కథనాలన్నీ ఉత్త ప్రచారమేనని ఖండించారు. ‘‘ఆయన (పుతిన్‌) సంపూర్ణ ఆరోగ్యవంతుడిగా ఉన్నారు.. ఎలాంటి వ్యాధి లక్షణాలు లేవు.. బుద్ధి, విచక్షణ ఉన్నవాళ్లు ఎవరూ ఇలా ప్రవర్తించరు.. ఉత్త ప్రచారాలు చేయడు.. ఈ అక్టోబరుతో పుతిన్‌కు 70 ఏళ్లు నిండుతాయి. అయినా రోజూ ఆయన వార్తల్లో కనిపిస్తున్నారు కదా?.. నిత్యం టీవీల్లోనూ ప్రసంగిస్తున్నారు.. కొందరికి కళ్లు మూసుకుపోయినట్టున్నాయి.. అయినా పుకార్లను వ్యాప్తిచేయడం వాళ్లకేం (పాశ్చాత్య మీడియాను ఉద్దేశించి) కొత్త కాదు కదా’’ అంటూ సెర్గీ లావ్రోవ్ మండిపడ్డారు.