ఆ స్నేహానికి...కదిలిన మనస్సులు ఎన్నో

కొన్ని ఘటనలు  మన మనస్సులను హత్తుకొంటాయి. అలాంటి ఓ వీడియో సామాజిక మాధ్యమాల్లో చక్కర్లు కొడుతోంది. ప్రతి ఒక్కర్ని అది కదిలించేస్తోంది.  పిల్లలకు కల్లాకపటం తెలియదు. పేదవాళ్లం, ధనవంతులం అనే తేడా అసలే తెలియదు. వాళ్ల ప్రపంచం అద్భుతమైనది. అందులో భేదాభిప్రాయాలు, వివక్షత, ఎక్కువ, తక్కువలు ఉండవు. వాళ్లు ఎంత నిర్మలంగా, స్వచ్ఛంగా ఉంటారో తెలియజేసే ఓ వీడియో సోషల్ మీడియాలో చక్కర్లు కొడుతుంది. దానిని చూసిన ప్రతి ఒక్కరూ మరోసారి తమ చిన్నతనంలోకి వెళ్లిపోతే బాగుండు అనుకుంటున్నారు. ఇద్దరి పిల్లల మధ్య సాగిన ఆ దృశ్యాలు తెలియని అనుభూతిని కలిగిస్తున్నాయి.

రోడ్డుపై ట్రాఫిక్‌ జామ్ అయి అన్ని వాహనాలు నిలిచిపోయిన సమయంలో ఓ పేద పిల్లవాడు కారు దగ్గరకు వెళ్తాడు. ఆ కారులో ఉన్న ధనవంతుడైన పిల్లవాడు ఆ పేద బాలుడికి ఆడుకోవడానికి తన బొమ్మలను ఇస్తాడు. వాటిని తీసుకుని ఆ కుర్రాడు ఆడుకుంటుంటాడు. కాసేపు ఆడుకుని ఆ బొమ్మలను తిరిగి ఇచ్చేస్తాడు. కానీ కారులో ఉన్న ఆ అబ్బాయి వాటిని తీసుకోడు. తర్వాత పేద బాలుడు అక్కడ నుంచి వెళ్లి తినడానికి స్నేక్స్ తెచ్చి కారులో ఉన్న కుర్రాడికి ఇస్తాడు. తర్వాత ఇద్దరు కలసి వాటిని తింటారు. కాసేపు కబుర్లు చెప్పుకుంటూ ఇద్దరూ పంచుకుని తింటారు. తర్వాత ట్రాఫిక్ క్లియర్‌ అయి  అక్కడ నుంచి కారు వెళ్లిపోతుంది. ఇద్దరు టాటా చెప్పుకుంటారు.

ఈ వీడియోని లక్షలాది మంది చూశారు. ఎంతోమంది లైక్ చేస్తున్నారు. నిజానికి ఇద్దరి పిల్లల మధ్య పేద, ధనిక అనే గీత ఉంది. కానీ అది వారికి తెలియదు. వారు వారి స్థానాలను మరిచి కొన్ని నిమిషాల్లో వారి వారి ప్రపంచాలను ఏకం చేసుకున్నారు. ఎటువంటి కల్మషం లేకుండా మంచి స్నేహితులుగా గడిపారు. అందుకే నెటిజన్లు ఈ వీడియోపై విపరీతంగా స్పందిస్తున్నారు. హృదయాలను తాకిందంటూ కామెంట్లు పెడుతున్నారు. ఈ అందమైన వీడియో ఇప్పటికే 2.3 లక్షల మందికిపైగా చూశారు.