మారుతీ సుజుకి సెలెరియో సెకండ్ జనరేషన్ కారుకు పెరుగుతున్న ఆదరణ

కొన్ని కార్లు అలా మార్కెట్ లోకి వస్తాయో లేదో అలా వాటికి ఇట్టే ఆదరణ పెరిగిపోతుంది. ఈ ఏడాది ప్రారంభంలో మారుతీ సుజుకి సెలెరియో సెకండ్ జనరేషన్ కారును భారత్‌లో లాంచ్ చేసింది. ఈ కారు కొత్త డిజైన్, ఇంటీరియర్స్, అప్‌డేట్ చేసిన పవర్‌ట్రైన్‌లకు మార్కెట్ నుంచి మంచి స్పందన వస్తోంది. గతేడాది ఇదే నెలలో తొలి తరం మోడల్ కేవలం 159 యూనిట్లు మాత్రమే అమ్ముడుపోతే, ప్రస్తుతం సెలెరియో సెకండ్ జనరేషన్ మోడల్ మాత్రం 6,398 యూనిట్లకు పైగా అమ్ముడుపోయింది. దీంతో వార్షిక అమ్మకాల పరంగా ఈ వెహికిల్ భారీగా 3,924 శాతం గ్రోత్‌ను నమోదు చేసింది.

సెలెరియో డిజైన్‌లో తాజాదనం ఉట్టిపడుతుంది. బాలెనో, స్విఫ్ట్ మాదిరి సెలెరియో రూపొందింది. సెలెరియో రెండవ తరం వెహికిల్ చూడటానికి ఆకర్షణీయంగా ఉండి, కొనుగోలుదారులను ఆకట్టుకుంటోంది. మారుతీ సుజుకి సెలెరియో కారు ధర ఎక్స్‌షోరూంలో రూ.5.25 లక్షల నుంచి ప్రారంభమై, రూ.7 లక్షల వరకు ఉంది.

ఈ కారు అమ్మకాలు పెరిగేందుకు చాలా కారణాలు ఉన్నాయి. లీటరు పెట్రోల్‌కే ఈ కారు 26.68 కి.మీ మైలేజ్‌ను అందిస్తోంది. అంతేకాక ఈ కారు ఎక్స్‌షోరూం ధర రూ.5.25 లక్షల నుంచే ప్రారంభమవుతుంది. మారుతీ సుజుకి సెలెరియోకి ఇచ్చిన 32 లీటర్ల ఫ్యూయల్ ట్యాంకు.. దూర ప్రయాణాలకు అనువైనదిగా ఉంది. ఈ ఫీచర్లతో ఈ కారు అమ్మకాలు భారీగా పెరిగాయి.

సుజుకి ఈ కారులో ఎక్కువ స్పేస్‌ను ఇచ్చింది. ఈ కారులో హిల్ హోల్డ్ అసిస్ట్‌ను, ఇంజిన్ స్టార్ట్-స్టాప్ ఫీచర్‌ను, లార్జ్ ఇన్‌ఫోటైన్మెంట్ స్క్రీన్‌ను అందించింది. 7 అంగుళాల స్మార్ట్‌ప్లే స్టూడియో డిస్‌ప్లే ఈ కారులో ఉంది. ఇది ఆపిల్ కారు ప్లే, ఆండ్రాయిడ్ ఆటోకి సపోర్టు ఇస్తుంది. ఈబీడీతో ఏబీఎస్, డ్యూయల్ ఎయిర్‌బ్యాగ్‌లను సేఫ్టీ ఫీచర్లుగా ఈ కారులో అందిస్తుంది. ఆరు రంగులలో ఈ కారు అందుబాటులో ఉంది. సాలిడ్ ఫైర్ రెడ్, ఆర్టిక్ వైట్‌తో స్పీడీ బ్లూ, సిల్కి సిల్వర్, గ్లిజనింగ్ గ్రే, కెఫైన్ బ్రౌన్, రెడ్, బ్లూ రంగులలో ఈ కారు మార్కెట్లోకి వచ్చింది.