ఇలా అయితే ఒకే...గంజాయి వినియోగంపై థాయిలాండ్ షాకింగ్ నిర్ణయం

గంజాయి అంటే ఎవరైనా ఇట్టే వ్యతిరేకిస్తారు. మరి ప్రభుత్వాలు ఉక్కుపాదం మోపుతుంటాయి. కానీ అందుకు భిన్నంగా గంజాయిపై థాయిలాండ్ స్పందించింది. గంజాయి సాగు, వాడకాన్ని చట్టబద్ధం చేసి థాయిలాండ్ పెద్ద బాంబే పేల్చింది. అయితే సిగరెట్‌లా అంటించి పీల్చడంపై మాత్రం నిషేదం కొనసాగుతుంది. ఆహారపదార్థాలు, డ్రింకుల్లో గంజాయిని వాడొచ్చు. కరోనా మహమ్మారి కారణంగా కుదేలైన వ్యవసాయ, పర్యాటక రంగానికి ఊపిరి పోసేందుకు ఈ ప్రమాదకర మార్గాన్ని థాయ్‌లాండ్ ఎంచుకున్నట్టు కనిపిస్తోంది. గంజాయిని నార్కోటిక్స్ జాబితా నుంచి తొలగిస్తూ ఉత్తర్వులు జారీ చేసింది. శ్రీలంక కూడా గంజాయిపై ఇలాంటి నిర్ణయం తీసుకుని ఆర్థిక ఇబ్బందుల నుంచి బయటపడుతుందేమో చూడాలి. గంజాయిని డ్రగ్స్ జాబితా నుంచి తొలగించిన మొదటి ఆగ్నేసియా దేశంగా థాయ్‌లాండ్ నిలిచింది.

థాయ్ తీసుకున్న ఈ నిర్ణయం అక్కడ గంజాయి సాగును ప్రోత్సహించడానికి సహకరిస్తుంది. ‘‘గంజాయి, జనపనార నుంచి ప్రజలు, ప్రభుత్వానికి ఆదాయాన్ని సంపాదించడానికి ఇది ఒక అవకాశం’’ థాయ్‌లాండ్ ఉప ప్రధాన మంత్రి, ఆరోగ్య మంత్రి అనుతిన్ చార్న్‌విరాకుల్ ఇటీవల సోషల్ మీడియాలో అన్నారు. ఫేస్‌బుక్‌లో గంజాయితో కలిపి వండి చికెన్ ఫోటోను షేర్ చేసిన ఆయన.. ఈ వంటకాన్ని ఎవరైనా విక్రయించాలని అనుకుంటే నిబంధనలు పాటించాల్సిందేనని తెలిపారు.

ఇక, గంజాయి సాగు చట్టబద్ధం చేయడంతో ప్రతి ఇంటి వద్ద అధికారుల అనుమతితో ఆరు వరకూ మొక్కలను పెంచుకోవచ్చు. అలాగే, పరిశ్రమలు కూడా గంజాయి సాగుకు అనుమతి తీసుకోవాలి. రెస్టారెంట్‌లలో గంజాయితో కలిపి వండి వంటకాలను, పానీయాలను కస్టమర్ల ఆర్డర్ చేసుకోవచ్చు. దేశవ్యాప్తంగా ఉన్న క్లినిక్‌లు గంజాయి చికిత్సను మరింత సులభంగా అందించగలవు. ఔషధాలుగా గంజాయి వాడకాన్ని 2018లో చట్టబద్ధం చేసిన తొలి ఆసియా దేశం థాయ్‌లాండ్.

అయినప్పటికీ, వ్యక్తిగతంగా ఉపయోగించడం మాత్రం ఇప్పటికీ చట్టవిరుద్ధం. బహిరంగంగా ధూమపానానికి వ్యతిరేకంగా అధికారులు హెచ్చరికలు చేయడంతో ఉపద్రవానికి దారితీస్తుందని భావిస్తున్నారు. తాజా ఈ ప్రణాళిక ప్రకారం గంజాయికి సంబంధించిన నేరాలకు పాల్పడిన సుమారు 4,000 మంది ఖైదీలను విడుదల చేయాలని ప్రభుత్వం లక్ష్యంగా పెట్టుకుంది. సాంప్రదాయ ఔషధాలలో చాలా మంది స్థానికులు సాధారణంగా ఉపయోగించే గంజాయితో థాయ్‌లాండ్‌కు సుదీర్ఘ చరిత్రే ఉంది.