మేం హెచ్చరించినా...నాడు ఉక్రెయిన్ పట్టించుకోలేదు: జో బైడెన్

రష్యా దాడి గురించి తాము ముందస్తు హెచ్చరికలు చేసినా ఉక్రెయిన్‌ అధినేత వొలొడిమిర్ జెలెన్‌స్కీ పెడచెవినపెట్టారని అమెరికా అధ్యక్షుడు జో బైడెన్ సంచలన వ్యాఖ్యలు చేశారు. ‘‘మాస్కో దాడి గురించి నేను చేసిన ముందస్తు హెచ్చరికలను అతిశయోక్తిగా చేసిన ప్రకటన అని చాలామంది భావించారు.. అది నాకు తెలుసు. కానీ మాకున్న సమాచారం ఆధారంగా మేం వెల్లడించాం.. ఆయన (రష్యా అధ్యక్షుడు వ్లాదిమిర్ పుతిన్‌ను ఉద్దేశించి) సరిహద్దుల్లోకి వెళ్లేందుకు సిద్ధమయ్యారు.. అందులో ఎటువంటి సందేహం లేదు. అయితే జెలెన్‌స్కీ మేం చెప్పిన విషయాన్ని వినడానికి ఇష్టపడలేదు. ఇంకా చాలామంది కూడా వినిపించుకోలేదు.. వారు మా మాటలను ఎందుకు వినకూడదనుకున్నారో నాకు అర్థమైంది.. కానీ ఆయన అప్పటికే వెళ్లిపోయారు’’ అని బైడెన్ వ్యాఖ్యానించారు. రష్యా దాడి గురించి నేను ముందస్తుగా చేసిన హెచ్చరికలను అతిశయోక్తిగా చేసిన ప్రకటన అని చాలామంది భావించారని, మాకున్న సమాచారం ఆధారంగా మేం వెల్లడించామని జో బైడెన్ స్పష్టం చేశారు. లాస్‌ఏంజెల్స్‌లో నిధుల సమీకరణ కోసం ఏర్పాటుచేసిన కార్యక్రమంలో పాల్గొన్న ఆయన ఈ సందర్భంగా ఉక్రెయిన్-రష్యా యుద్ధం ఆరంభానికి ముందు నాలుగు నెలలనాటి పరిణామాలను వివరించారు.

ఇదిలావుంటే ఫిబ్రవరి 24న ప్రత్యేక సైనిక చర్య పేరుతో రష్యా దురాక్రమణ మొదలుపెట్టడానికి ముందే.. మాస్కో సైనిక సన్నద్ధతపై అమెరికా హెచ్చరికలు చేసింది. తేదీతో సహా యుద్ధం ప్రారంభమయ్యే రోజును కూడా ప్రకటించింది. కానీ, తేదీలో మార్పు జరిగినా..అంచనా వేసినట్టుగానే క్రెమ్లిన్ సేనలు దురాక్రమణకు దిగాయి. అమెరికా హెచ్చరికలను ఐరోపా మిత్రదేశాలు కూడా కొట్టిపారేశాయి. అమెరికా మరీ ఎక్కువ ముందు జాగ్రత్త పడుతోందని అంతా భావించారు.

మరోవైపు, రష్యా దండయాత్ర ఐరోపాలో భారీ ఎత్తున ప్రజలు వలస వెళ్లడానికి కారణమైంది. ఆరేళ్లపాటు జరిగిన రెండో ప్రపంచ యుద్ధంలో చోటు చేసుకున్న వలసలను ప్రస్తుతం ఉక్రెయిన్ యుద్ధం మించేలా ఉంది. ప్రపంచ వ్యాప్తంగా 10 కోట్ల మంది ప్రజలు తమ తమ దేశాల నుంచి వలస వెళ్లినట్లు ఐరాస శరణార్థుల హైకమిషన్ నివేదిక ఇటీవల వెల్లడించింది.