కర్తవ్యం చీపురు పట్టేలా చేసింది...ఆ ట్రాఫిక్ కానిస్టేబుల్ పై ప్రశంసల వర్షం

ఓ పోలీస్ గా ఆయన ట్రాఫిక్ విధులను నిర్వహిస్తున్నారు. అంతలోనే ఓ సాధారణ పౌరుడిగా కూడా తన కర్తవ్యాన్ని ఆయన నెరవేర్చాడు. ఎవరికైనా ఇబ్బంది ఏర్పడ్డకుండా స్పందించడం ప్రతి పౌరుడి కర్తవ్యం. అందుకే పోలీస్ గా విధులు నిర్వహిస్తూనే రోడ్డుపై పడివున్న కంకరను తొలగించేందుకు సాధారణ పౌరుడి కర్తవ్యంగా భావించాడు ఆ పోలీస్.

ఓ ట్రాఫిక్ పోలీస్ వాహనాలను కంట్రోల్ చేయడం కాదు. చేతిలో చీపురు పట్టుకుని రోడ్డు ఊడ్చాడు. అతను చేసిన పనికి నెటిజన్లు ఫిదా అయిపోయారు. అవును కంకర రవాణాను చేసే వాహనం నుంచి కంకర రాళ్లు రోడ్డుపై పడిపోయాయి. దాంతో ద్విచక్ర వాహనాలు జారే ప్రమాదంతోపాటు.. వాటి టైర్లు పంక్చర్ అయ్యే ప్రమాదం కూడా ఉంది. దాంతో ఆ ట్రాఫిక్ పోలీస్ చీపురు పట్టుకుని రోడ్డుపై పడిపోయిన కంకరను పక్కకు ఊడ్చారు. అతను రోడ్డు ఊడ్చే వరకు అటువైపు రాకుండా ఒక వ్యక్తి సహకరించాడు.

ఆ ట్రాఫిక్ పోలీస్ చేసిన పనిని ఎవరో వీడియో తీశారు. సంబంధిత వీడియోను ఐఏఎస్ అధికారి అవనీష్ శరణ్ సోషల్ మీడియాలో షేర్ చేశారు. అతను "మిమ్మల్ని గౌరవిస్తున్నా." అని అందులో పేర్కొన్నారు. ఆ వీడియో ట్విట్టర్‌లో వైరల్ అయింది. అయితే ఈ ఘటన ఎక్కడో.. ఎప్పుడు జరిగిందో మాత్రం తెలియరాలేదు. కానీ అక్కడ ఓ వాహనంపై రాసి ఉన్న రాత ఆధారంగా ఇది తమిళనాడుకు చెందినదిగా కొందరు వినియోగదారులు భావిస్తున్నారు. ఆ వీడియోను చూసిన వారు నిజాయితీగల అధికారి అంటూ నెటిజన్లు ప్రశంసలు కురిపిస్తున్నారు. ఇతరుల పట్ల ఆయన చూపి మానవత్వానికి హ్యాట్సాఫ్ చెప్పారు. కొందరు అతను చేసిన మంచి పనికి గుర్తింపు లభిస్తుందా..? అతను దానికి ప్రతిఫలం పొందేందుకు అర్హుడా..? అంటూ కామెంట్లు పెట్టారు.

అయితే గతంలో ఇలాంటి ఓ సంఘటన చోటుచేసుకుంది. 2020లో ఒడిశాకు చెందిన ఒక ట్రాఫిక్ గార్డు ఇలాగే రోడ్డుపై పడిన చెత్తను ఊడ్చారు. అప్పట్లో దీనికి సంబంధించిన వీడియో వైరల్ అయింది. దాంతో పై అధికారులు అతడిని ప్రశంసించారు. నెటిజన్లు కూడా పొగడ్తలతో ముంచెత్తారు.