త్వరలో పోలీస్ రిక్రూట్ మెంట్...గ్రీన్ సిగ్నల్ ఇచ్చిన సీఎం

రాష్ట్రంలో చాలా కాలంగా పెండింగ్ పోలీసు ఉద్యోగాల భర్తీపై సీఎం జగన్ క్లారిటీ ఇచ్చారు. పోలీసు ఉద్యోగాల భర్తీకి యాక్షన్‌ ప్లాన్‌ సిద్ధం చేయాలని అధికారులను సీఎం జగన్‌ ఆదేశించారు. పోలీసు విభాగం, ఆర్థిక శాఖ అధికారులు కూర్చొని వీలైనంత త్వరగా నియామక ప్రక్రియ ప్రారంభించాలన్నారు. పోలీసు శాఖలో రిక్రూట్‌మెంట్‌పై వచ్చే నెల మొదటి వారంలో నివేదించాలని సూచించారు. కార్యాచరణ ప్రకారం క్రమం తప్పకుండా పోలీసు ఉద్యోగాలను భర్తీ చేయాలని సీఎం జగన్‌ స్పష్టం చేశారు.

రాష్ట్రంలో గత ఏడాది కాలంగా జరిగిన రిక్రూట్‌మెంట్, ఇంకా భర్తీ చేయాల్సిన పోస్టుల భర్తీపై అధికారులతో ముఖ్యమంత్రి వైఎస్‌ జగన్మోహన్ రెడ్డి సమగ్రంగా సమీక్షించారు. ఈ మేరకు శుక్రవారం తాడేపల్లిలోని సీఎం క్యాంపు కార్యాలయంలో జాబ్‌ క్యాలెండర్‌పై ముఖ్యమంత్రి జగన్మోహన్‌రెడ్డి సమీక్ష చేపట్టారు. ఈ సందర్భంగా రిక్రూట్‌ చేసిన పోస్టుల వివరాలను సీఎం జగన్‌కు అధికారులు నివేదించారు.

2021- 22లో 39,654 పోస్టులు భర్తీ చేసినట్లు అధికారులు వెల్లడించారు. ఒక్క వైద్య ఆరోగ్య శాఖలోనే 39,310 పోస్టులు భర్తీ చేశామన్నారు. గుర్తించిన 47,465 పోస్టుల్లో 83.5 శాతం పోస్టుల రిక్రూట్‌మెంట్‌ ఈ ఒక్క ఏడాదిలో పూర్తి చేశామన్నారు. ఇంకా, సుమారు 8 వేల పోస్టులు భర్తీ చేయాల్సి ఉందని అధికారులు తెలిపారు. భర్తీ చేయాల్సిన పోస్టుల్లో 1,198 పోస్టులు వైద్య ఆరోగ్య శాఖలోనే ఉన్నాయని చెప్పారు.

నిర్దేశించుకున్న సమయంలోగా ఈ పోస్టులను భర్తీ చేసేందుకు అన్ని రకాల చర్యలు తీసుకోవాలని సీఎం జగన్ సూచించారు. విద్య, వైద్యంపై చాలా డబ్బు వెచ్చించి ఆస్పత్రులు, విద్యాలయాలు కడుతున్నామని ఈ సందర్భంగా సీఎం జగన్‌ గుర్తు చేశారు. ఆయా శాఖల్లో ఖాళీలు భర్తీ చేయకపోవడం సరికాదన్నారు. ఉన్నత విద్యలో టీచింగ్‌ పోస్టుల భర్తీలో పారదర్శకత, సమర్థతకు పెద్ద పీటవేసేలా నిర్ణయాలు ఉండాలని సీఎం జగన్‌ స్పష్టం చేశారు. రెగ్యులర్‌ పోస్టులు అయినా, కాంట్రాక్టు పోస్టులు అయినా పూర్తి పారదర్శకంగా నియమకాలు జరగాలని తేల్చిచెప్పారు. దీనికోసం ప్రతిపాదనలు తయారు చేయాలని అధికారులకు సీఎం జగన్‌ ఆదేశాలు జారీ చేశారు.

ఈ సందర్భంగా జాబ్‌ క్యాలెండర్‌లో నిర్దేశించుకున్న పోస్టుల్లో ఇంకా భర్తీ కాకుండా మిగిలిన పోస్టుల రిక్రూట్‌మెంట్‌పై కార్యాచరణ రూపొందించాలని ఈ సందర్భంగా సీఎం జగన్ అధికారులను ఆదేశించారు. వైద్య, ఆరోగ్య శాఖలో మిగిలిన పోస్టులను ఈ నెలాఖరులోగా, ఉన్నత విద్యా శాఖలో అసిసోయేట్‌ ప్రొఫెసర్‌ పోస్టులను సెప్టెంబరులోగా, ఏపీపీఎస్సీలో పోస్టులను మార్చిలోగా భర్తీ చేయాలన్నారు.