ఆ డిపాజిటర్లకు..హెచ్‌డీఎఫ్‌సీ గుడ్ న్యూస్...వడ్డీ రేట్లు భారీగా పెరగనున్నాయి

కస్టమర్లను కాపాడుకొనేందుకు హెచ్‌డీఎఫ్‌సీ తనదైన శైలీలో నడుచుకొంటోంది.కస్టమర్లకు శుభవార్త. ఈ వారంలో రెండోసారి తన ఫిక్స్‌డ్ డిపాజిట్ల వడ్డీ రేట్లను హెచ్‌డీఎఫ్‌సీ బ్యాంకు పెంచింది. 25 బేసిస్ పాయింట్ల వరకు ఎఫ్‌డీ రేట్లను పెంచుతున్నట్టు హెచ్‌డీఎఫ్‌సీ బ్యాంకు ప్రకటించింది. కొత్త రేట్లు నేటి నుంచే అంటే జూన్ 17, 2022 నుంచి అమల్లోకి తెస్తున్నట్టు బ్యాంకు పేర్కొంది. రూ.2 కోట్ల కంటే తక్కువున్న ఎఫ్‌డీ మొత్తాలపై ఈ కొత్త వడ్డీ రేట్లు అమలవుతాయి.

ఇదిలావుంటే ఈ వారంలో బుధవారమే(జూన్ 15, 2022) హెచ్‌డీఎఫ్‌సీ బ్యాంకు ఎంపిక చేసిన టెన్యూర్లపై 25 బేసిస్ పాయింట్ల వరకు వడ్డీ రేట్లను పెంచింది. హెచ్‌డీఎఫ్‌సీ బ్యాంకు వెబ్‌సైట్ ప్రకారం... ఆరు నెలల నుంచి తొమ్మిది నెలల కంటే తక్కువ కాల వ్యవధి కలిగిన ఎఫ్‌డీలపై బ్యాంకు 4.65 శాతం వడ్డీని ఆఫర్ చేస్తుంది. ఈ వడ్డీని 4.40 శాతం నుంచి పెంచింది. అలాగే 9 నెలల నుంచి ఏడాది లోపు టెన్యూర్ కలిగిన ఎఫ్‌డీలకు 4.65 శాతం, ఏడాది నుంచి రెండేళ్ల ఎఫ్‌డీలకు 5.35 శాతం వడ్డీ రేటును ఆఫర్ చేస్తుంది.

7 రోజుల నుంచి 29 రోజుల ఎఫ్‌డీలపై హెచ్‌డీఎఫ్‌సీ బ్యాంకు కస్టమర్లు 2.75 శాతం వడ్డీ రేటును పొందవచ్చు. ఈ రేటు 2.50 శాతం నుంచి పెరిగింది. 30 రోజుల నుంచి 90 రోజుల వరకు టెన్యూర్ కలిగిన ఎఫ్‌డీలపై బ్యాంకు ప్రస్తుతం 3 శాతం నుంచి 3.25 శాతానికి వడ్డీ రేటును పెంచింది. 91 రోజుల నుంచి 6 నెలల ఎఫ్‌డీలపై 3.75 శాతం వడ్డీని, ఏడాది నుంచి రెండేళ్ల ఎఫ్‌డీలపై 5.35 శాతం వడ్డీని హెచ్‌డీఎఫ్‌సీ బ్యాంకు ఆఫర్ చేస్తుంది.

ప్రస్తుతం రెండేళ్ల ఒక్క రోజు నుంచి మూడేళ్ల కాల వ్యవధి కలిగిన ఎఫ్‌డీలపై బ్యాంకు 5.50 శాతం వడ్డీ రేటును ఆఫర్ చేయనుంది. ఈ రేటు అంతకుముందు 5.40 శాతంగా ఉండేది. అలాగే మూడేళ్ల ఒక్క రోజు నుంచి ఐదేళ్ల టెన్యూర్ కలిగిన ఎఫ్‌డీలపై బ్యాంకు వడ్డీ రేటును 5.60 శాతం నుంచి 5.70 శాతానికి వడ్డీ రేటును పెంచింది.

రిజర్వు బ్యాంకు ఆఫ్ ఇండియా కీలక వడ్డీ రేట్లను 50 బేసిస్ పాయింట్లు పెంచిన తర్వాత... చాలా బ్యాంకులు తమ ఎఫ్‌డీ కస్టమర్లకు శుభవార్త చెబుతున్నాయి. ఎఫ్‌డీలపై వడ్డీ రేట్లను పెంచుతున్నాయి. రాబోయే నెలల్లో ఈ రేట్లు మరింత పెరుగుతాయని తెలుస్తోంది. ఇది ఎఫ్‌డీ కస్టమర్లకు శుభవార్తనే.