ఇక ఫ్రాన్స్‌లోనూ మన యూపీఏ పేమెంట్స్

ఫ్రాన్స్ దేశంలోనూ మన యూపీఐ పేమెంట్స్ సేవలు విస్తరించనున్నాయి. ఇది యూనిఫైడ్ పేమెంట్స్ ఇంటర్‌ఫేస్(యూపీఐ), రూపే కార్డులకు మరింత బూస్టప్. ఈ సర్వీసులను త్వరలోనే ఫ్రాన్స్‌లో లాంచ్ చేయనున్నట్టు కేంద్ర కమ్యూనికేషన్ మంత్రి అశ్విని వైష్ణవ్ చెప్పారు. ఫ్రాన్స్‌లో యూపీఐ, రూపే సర్వీసులను లాంచ్ చేసేందుకు ఫ్రాన్స్‌కు చెందిన లైరా నెట్‌వర్క్‌తో కలిసి నేషనల్ పేమెంట్స్ కార్పొరేషన్ ఆఫ్ ఇండియా(ఎన్‌పీసీఐ) అంతర్జాతీయ సంస్థ మెమోరాండం ఆఫ్ అండర్‌స్టాండింగ్‌పై సంతకం చేసినట్టు తెలిపారు.

ఫ్రాన్స్‌కు ప్రయాణం చేయాలనుకునే వారు ఎలాంటి ఇబ్బందులు లేకుండా పేమెంట్లు చేసుకునేందుకు ఈ ఎంఓయూ ఉపయోగపడుతుందని ఎన్‌పీసీఐ చెప్పింది. ఫ్రాన్స్‌లో యూపీఐ పేమెంట్ల రాక వల్ల పేమెంట్లు ఎంత తేలికవుతాయో తనకు ఎదురైన అనుభవాన్ని ఫ్రాన్స్‌లో భారత రాయబారి జావెద్ ఆష్రఫ్ చెప్పారు. ‘‘ఒకసారి నేను డాక్టర్ వద్దకు వెళ్లాను. ఆయన నన్ను నగదు లేదా చెక్ రూపంలో చెల్లించమని అడిగారు. కానీ క్యాష్ విత్ డ్రా చేయడానికి నేను ఏటీఎంకి వెళ్లాల్సి వచ్చింది. ఒకవేళ ఫ్రాన్స్‌లో యూపీఐ ఉండుంటే.. ఫ్రాన్స్ ప్రజలకు ఎంతో ప్రయోజనం కలిగేది. యూపీఐ ప్రయోజనాలను మనం ఫ్రాన్స్‌తో షేరు చేస్తే.. వారు కచ్చితంగా అంగీకరిస్తారు’’ అని ఆష్రఫ్ చెప్పారు.

 భారత్ 5.5 బిలియన్ యూపీఐ లావాదేవీలను చేస్తుందని ప్రపంచమంతా చూస్తుందని, భారత్‌కు ఇది అతిపెద్ద ఘనతని వైష్ణవ్ తెలిపారు. నేడు ఫ్రాన్స్‌తో కుదుర్చుకున్న ఒప్పందంతో.. ప్రపంచం దిశగా అడుగులు వేస్తున్నామని చెప్పారు. ఇది డిజిటల్ పేమెంట్స్ ఎకోసిస్టమ్‌లో గేమ్ ఛేంజర్‌గా మారనుందని ఆశాభావం వ్యక్తం చేశారు.

ఇప్పటికే సింగపూర్, యూఏఈ, భూటాన్, నేపాల్ దేశాలు భారత యూపీఐ పేమెంట్ సిస్టమ్‌ను అమలు చేస్తున్నాయి. అమెరికా, యూరోపియన్ దేశాలు, పశ్చిమాసియాలలో యూపీఐ సర్వీసులను విస్తరించేందుకు ఎన్‌పీసీఐ ఇంటర్నేషనల్ చర్చలు జరుపుతోంది.