వారి బేగంలు ఎంతో రిచ్ అంటా: పాకిస్తాన్ ప్రధానుల భార్యలపై ప్రత్యేక నివేదిక

పాకిస్తాన్ ప్రధానుల భార్యల విషయంలో ఇటీవల ఓ ఆసక్తికర అంశం వెలుగులోకి వచ్చింది. పాకిస్థాన్‌లో పాలకుల కంటే వారి పత్నులే అధిక ధనవంతులు అని తేలింది. వారి ఖాతాల్లో నగదుతో పాటు పేరిట ఆస్తులూ ఎక్కువే ఉన్నట్టు ఎన్నికల కమిషన్‌కు సమర్పించిన అఫిడ్‌విట్ వివరాల ద్వారా వెల్లడయ్యింది. పాకిస్థాన్ ప్రధాని, మాజీ ప్రధాని ఇమ్రాన్ ఖాన్ ఆస్తులకు సంబంధించిన వివరాలు బయటపడ్డాయి. ఇమ్రాన్‌ ఖాన్‌కు రెండు లక్షల పాకిస్థానీ రూపాయల (పీకేఆర్‌) విలువైన నాలుగు మేకలు.. వారసత్వంగా లభించిన ఆస్తులతో పాటు ఆరు స్థిరాస్తులున్నాయి. బ్యాంకు ఖాతాలో 60 మిలియన్ల పాక్ కరెన్సీ, విదేశీ నగదు ఖాతాల్లో 329,196 అమెరికన్ డాలర్లు, 518 పౌండ్లు ఉన్నట్లు బయటపడింది. అయితే, ఇమ్రాన్‌ ఖాన్ పేరిట ఒక్క వాహనం కూడా లేకపోవడం గమనార్హం.

అంతేకాదు, విదేశాల్లోనూ ఆయన పేరుతో ఆస్తులుగానీ, ఏ సంస్థలోనూ పెట్టుబడులుగానీ లేవు. కానీ, ఆయన భార్య బుష్రా బీబీ ఖాతాలో 142.11 మిలియన్ల పాక్ కరెన్సీ, నాలుగు స్థిరాస్తులు ఉన్నాయి. అలాగే, ప్రస్తుత ప్రధాని షెహబాజ్‌ షరీఫ్‌కు కూడా తన మొదటి భార్య కంటే తక్కువ నగదే ఉన్నట్టు అఫిడ్‌విట్‌లో తెలిపారు. ఆమె ఖాతాలో 230.29 మిలియన్ల ఉండగా..తొమ్మిది వ్యవసాయ సంబంధిత ఆస్తులున్నాయి. లాహోర్, హజారాలో రెండు ఇళ్లు.. పలు సంస్థల్లో చెప్పుకోదగ్గ పెట్టుబడులున్నాయి. అయితే, ఆమెకు సొంత వాహనం ఏమీ లేదు. కానీ, మనీ ల్యాండరింగ్ కింద ఆమెపై గత ఏడాది అభియోగాలు నమోదయ్యాయి.

షెహబాజ్ రెండో భార్య తెహ్మీనా దుర్రానీ ఖాతాలో చాలా కాలం నుంచి 5.76 మిలియన్ల పీకేఆర్‌లు నిల్వ ఉన్నాయి. ప్రధాని షెహబాజ్‌ బ్యాంకు ఖాతాలో 104.21 మిలియన్ల పాక్‌ కరెన్సీ ఉండగా.. రూ.141.78 మిలియన్ల అప్పులుండటం గమనార్హం. అలాగే, లాహోర్, షైఖ్‌పుర్‌లో వ్యవసాయ భూములు, ముర్రే, లాహోర్‌లో ఒక్కో ఇళ్లు ఉండగా.. లండన్‌లో రూ.137.43 మిలియన్ల ఖరీదు భవంతి ఉంది. ప్రధాని పేరుతో రెండు వాహనాలు ఉన్నట్టు తెలిపారు.

పాకిస్థాన్ పీపుల్స్ పార్టీ అధ్యక్షుడు బిలావల్ భుట్టో జర్దారీ బిలీనియర్‌. ఆయన సంపద 1.6 బిలియన్లగా పేర్కొన్నారు. అలాగే, యూఏఈలోనూ భారీగా ఆస్తులున్నట్టు తెలిపారు. పాక్ కంటే యూఏఈలోనే ఆయనకు ఆస్తులు ఎక్కువగా ఉండగా.. దుబాయ్‌లోని 25 ఆస్తుల విలువే 1.44 బిలియన్లు. బిలావల్ భుట్టోకు 19 వ్యవసాయ, వ్యవసాయేతర ఆస్తులు, బ్యాంకులో రూ.122.14 మిలియన్ల సొమ్ము ఉంది.