చైనా ఖాతాలోకి మరో అత్యాధునిక ఎయిర్‌క్రాఫ్ట్ కారియర్

ప్రత్యర్థులపై దాడులకు తెగబడేందుకు సమయంకోసం చూస్తున్న చైనా తన ఆయుధ సంపతిని అందుకు అనుగుణంగా పెంచుకొంటోంది. తాజాగా చైనా  అత్యాధునిక ఎయిర్‌క్రాఫ్ట్ కారియర్ ‘ఫ్యూజియన్‌’ను లాంచ్ చేసింది. షాంఘైలోని జియాంగ్నన్ షిప్‌యార్డ్ నుంచి లాంచ్ చేసిన ఈ యుద్ధ విమాన వాహక నౌకను చైనా పూర్తిగా స్వదేశీ పరిజ్ఞానంతో రూపొందించింది. చైనా వద్ద ఇప్పటికే సోవియట్ కాలం నాటి టెక్నాలజీతో పని చేసే లియావోనింగ్, షెన్‌డాంగ్ అనే రెండు ఎయిర్‌క్రాఫ్ట్ కారియర్లు ఉన్నాయి. ఈ రెండింటితో పోలిస్తే ఫ్యూజియన్ అత్యాధునికమైంది.

ఇదిలావుంటే చైనా తొలి ఎయిర్‌క్రాఫ్ట్ కారియర్‌ లియావోనింగ్ సోవియట్ కాలానికి చెందినది. 1998లో ఉక్రెయిన్ నుంచి దీన్ని కొనుగోలు చేసిన చైనా.. తర్వాత దాన్ని ఆధునికీకరించి 2012లో సముద్ర జలాల్లోకి ప్రవేశపెట్టింది. దాని సాయంతో షెన్‌డాంగ్ అనే కారియర్‌ను దేశీయంగా నిర్మించింది. 2019 డిసెంబర్లో ఇది సర్వీసులోకి వచ్చింది.

అమెరికా ఎయిర్‌క్రాఫ్ట్ కారియర్లలో వాడే తరహాలోనే ఇందులో ఎలక్ట్రోమ్యాగ్నెటిక్ కాటాపల్ట్ అసిస్ట్‌డ్ లాంచ్ సిస్టమ్‌ను ఉపయోగించారు. చైనా వద్ద ఉన్న మిగతా రెండు కారియర్లలో అడ్వాన్స్‌డ్ స్కై జంప్ స్టయిల్ సిస్టమ్‌‌ను వాడారు. నూతన విధానం వాడటం వల్ల.. ఎక్కువ ఆయుధాలతో, అనేక రకాల యుద్ధ విమానాలను.. ఫ్యూజియన్ మీది నుంచి ప్రయోగించే వీలుంది. అంతే కాదు శత్రువుల దాడులను తిప్పికొట్టే వ్యవస్థను సైతం ఇందులో ఏర్పాటు చేశారు. దీని సామర్థ్యం 80 వేల టన్నులని జిన్హువా వెల్లడించింది.

తన ఎయిర్‌క్రాఫ్ట్ కారియర్లకు సాగర తీరంలోని ప్రావిన్సుల పేర్లు పెడుతున్న చైనా.. తాజాగా రూపకల్పన చేసిన దానికి ఫ్యూజియన్ అని పేరు పెట్టింది. ఫ్యూజియన్ ప్రావిన్స్ తైవాన్‌కు చేరువలో ఉంటుంది. ఫ్యూజియన్, తైవాన్‌లను జలసంధి వేరు చేస్తుండగా.. రెండింటి మధ్య దూరం కేవలం 120 కిలోమీటర్లు మాత్రమే. తైవాన్‌ను ఆక్రమించుకోవడానికి చైనా ప్రయత్నాలు చేస్తోందని ప్రచారం జరుగుతున్న నేపథ్యంలో.. బీజింగ్ తన ఎయిర్‌క్రాఫ్ట్ కారియర్‌కు దాని సమీపంలోని ప్రావిన్స్ పేరు పెట్టడం గమనార్హం.

ఎయిర్‌క్రాఫ్ట్ కారియర్లు కదిలే ఎయిర్‌బేస్‌ల్లా ఉపయోగపడతాయి. వీటి సాయంతో యుద్ధ విమానాలను తక్షణమే, దీర్ఘకాలంపాటు మోహరించే వీలు ఉంటుంది. అమెరికాతో ఉద్రిక్తతలు పెరుగుతున్న తరుణంలో.. క్వాడ్‌లో సభ్య దేశంగా ఉన్న భారత్‌ను కవ్వించేందుకు హిందూ మహాసముద్రంలోనూ ఈ ఎయిర్‌క్రాఫ్ట్ కారియర్‌ను మోహరించే అవకాశాలు లేకపోలేదు.