ఈ దేశానికి నిజమైన ప్రభుత్వాన్ని తీసుకురండి: దేశ ప్రజలకు ప్రియాంకా గాంధీ పిలుపు

బీజేపీ ప్రభుత్వ వ్యతిరేక విధానాలకు వ్యతిరేకంగా ఈ దేశానికి నిజమైన ప్రభుత్వాన్ని తీసుకురావాల్సిన అవసరం ఎంతైనా ఉందని కాంగ్రెస్ పార్టీ నాయకురాలు ప్రియాంకా గాంధీ పేర్కొన్నారు. అగ్నిపథ్ స్కీమ్‌కు వ్యతిరేకంగా అభ్యర్థులు శాంతియుతంగా ఆందోళన చేసి ప్రభుత్వాన్ని కూల్చివేయాలని కాంగ్రెస్ పార్టీ ప్రధాన కార్యదర్శి ప్రియాంక గాంధీ పిలుపునిచ్చారు. కేంద్ర ప్రభుత్వం ప్రకటించిన అగ్నిపథ్ పథకాన్ని వ్యతిరేకిస్తూ కాంగ్రెస్ పార్టీ కూడా నిరసన తెలిపింది. ఈ మేరకు ఢిల్లీలోని జంతర్ మంతర్ దగ్గర ఆదివారం సత్యాగ్రహ దీక్ష చేపట్టింది. ఈ నిరసన దీక్షలో ప్రియాంక గాంధీతో పాటు పలువురు ఎంపీలు, పార్టీ కీలక నేతలు పాల్గొన్నారు.

ఈ సందర్భంగా ప్రియాంక గాంధీ మాట్లాడుతూ అగ్నిపథ్ స్కీమ్ దేశంలోని యువతను చంపుతుంది, సైన్యాన్ని అంతం చేస్తుందని అన్నారు. "ఈ పథకం దేశంలోని యువతను చంపుతుంది. సైన్యాన్ని అంతం చేస్తుంది. ప్రజాస్వామ్య, శాంతియుత, అహింసా మార్గాల ద్వారా దీనిని పడగొట్టండి. మీ లక్ష్యం దేశానికి నిజమైన ప్రభుత్వాన్ని తీసుకురావాలి. దేశ ఆస్తులను రక్షిస్తూ.. శాంతియుతంగా నిరసన తెలపాలని నేను మిమ్మల్ని కోరుతున్నాను. కానీ ఆగవద్దు. ఇవి మీ హక్కులు, ఇది మీ దేశం, దీన్ని రక్షించడం మీ కర్తవ్యం. కాంగ్రెస్‌లోని ప్రతి నాయకుడు, కార్యకర్త మీ వెంట ఉన్నారు.". అని ప్రియాంక ఉన్నారు.

ఇదే సందర్భంగా కాంగ్రెస్ నాయకుడు రాహుల్ గాంధీ.. ప్రధాన మంత్రి మోదీపై ధ్వజమెత్తారు. ప్రభుత్వం ఉద్యోగాలంటూ తప్పుడు వాగ్దానాలు చేస్తుందని , యువత నిరుద్యోగ బాటలో నలిచేలా చేస్తుందని రాహుల్ మండిపడ్డారు. దేశంలోని ప్రస్తుత పరిస్థితులకు కేవలం ప్రధాని ఒక్కరిదే బాధ్యత అని, నిరసనలు చేస్తున్న యువతకు కాంగ్రెస్ కార్యకర్తలు అండగా నిలవాలని రాహుల్ సూచించారు. కాంగ్రెస్ పార్టీ నిరసన దీక్షలో జైరాం రమేష్‌, రాజీవ్‌ శుక్లా, సచిన్‌ పైలట్‌, సల్మాన్‌ ఖుర్షీద్‌, అల్కా లాంబా తదితరులు పాల్గొన్నారు. కాగా నిరసన వేదిక వద్ద భారీగా పోలీసులు, పారా మిలట్రీ బలగాలను మోహరించారు.