అందరి టార్గెట్ ఏపీ పీఠం...జనసేనాని ఆప్షన్ ను నో రెస్పాన్స్

వచ్చే ఎన్నికల్లో ఏపీలో ద్విముఖ పోటీయా లేక చతుర్ముఖ పోటీయా అన్నది తేల్చడం ఇప్పట్లో కష్టసాధ‌్యంగానే కనిపిస్తోంది. అధికార వైసీపీ గత ఎన్నికల్లోనూ కాదు వచ్చే ఎన్నికల్లోనూ ఏ పార్టీతో పొత్తు లేకుండా ముందుకు సాగడం ఖాయమైపోయింది. ఇక ఏపీలోని ఇతర రాజకీయ పార్టీలు పొత్తుకడతాయా లేక ఎవరిదారిన వారు పోటీకి దిగుతారా అన్నది ఆసక్తికర చర్చ సాగతుందోంది.

ఇటీవల జనసేన అధినేత పవన్ కళ్యాణ్ టీడీపీ, బీజేపీ ముందు మూడు ఆప్షన్లు పెట్టారు. రాబోయే ఎన్నిక‌ల్లో జ‌న‌సేన ఒంటరిగా పోటీచేయ‌డం, జ‌న‌సేన‌-బీజేపీ క‌లిసి పోటీచేయ‌డం, జ‌న‌సేన‌-బీజేపీ-టీడీపీ క‌లిసి పోటీచేయ‌డం. అయితే మారుతున్న రాజ‌కీయ ప‌రిణామాల‌ను ప‌రిశీలించిన త‌ర్వాత ప‌వ‌న్ క‌ల్యాణే స్వ‌యంగా ఒక ఆప్ష‌న్ ఎంచుకున్న‌ట్లు సీనియ‌ర్ రాజ‌కీయ‌వేత్త‌లు అభిప్రాయ‌ప‌డుతున్నారు. ప‌ర్చూరు బ‌హిరంగ‌స‌భ‌లో జ‌న‌సేనాని మాట్లాడిన మాట‌ల‌ను బ‌ట్టి ఈ అభిప్రాయానికి వ‌చ్చిన‌ట్లు చెబుతున్నారు. త‌న‌కు ఎవ‌రితోను పొత్తుండ‌ద‌ని, పొత్తుల‌పై మాట్లాడే స‌మ‌యం కాద‌ని, త‌న పొత్తు కేవ‌లం ప్ర‌జ‌ల‌తోనే ఉంటుంద‌ని ఆ స‌భ‌లో జ‌న‌సేనాని స్ప‌ష్టం చేశారు. ఒక‌ర‌కంగా ఆయ‌న తెలుగుదేశం పార్టీకి ఈ వేదిక నుంచి హెచ్చ‌రిక జారీచేశార‌ని భావిస్తున్నారు. పొత్తుకు తాను సిద్ధంగా లేననే విష‌యాన్ని ప‌రోక్షంగా తెలియ‌జేశారు. చంద్ర‌బాబునాయుడు లాంటి సీనియ‌ర్ నేత‌, ప‌రిపాల‌న ద‌క్ష‌త ఉన్న నేతను ముఖ్య‌మంత్రి ప‌ద‌వి త్యాగం చేయాల‌ని కోర‌డానికి ఇది స‌రైన స‌మ‌యం కాద‌ని తెలుగుదేశం పార్టీ నేత‌లు వ్యాఖ్యానిస్తున్నారు. అప్పుల్లో కూరుకుపోయి, అభివృద్ధికి దూరంగా ఉన్న ఏపీని గాడిన పెట్టాలంటే చంద్ర‌బాబు ఒక్క‌డే స‌మ‌ర్థ‌వంత‌మైన నేత అని చెబుతున్నారు.

టీడీపీ నేత‌లు కూడా చంద్ర‌బాబు అనుభ‌వం, పాల‌నా ద‌క్ష‌త గురించి ప‌దే ప‌దే మీడియా స‌మావేశాల్లో ప్ర‌స్తావిస్తుండ‌టంద్వారా తెలుగుదేశం పార్టీ ముఖ్య‌మంత్రి ప‌ద‌విని త్యాగం చేయ‌డానికి సిద్ధంగా లేద‌నే విష‌యం స్ప‌ష్ట‌మ‌వుతోంది. జ‌న‌సేనాని 2024 ఎన్నిక‌లు కీల‌క‌మ‌నే అభిప్రాయంతో ఉన్నారు. 2014 ఎన్నిక‌ల్లోనే పోటీచేయ‌కుండా త‌ప్పుచేశాన‌ని, అప్పుడే పోటీచేసివుంటే ఈరోజు పార్టీ ఇత‌ర ప్ర‌ధాన పార్టీల‌ను డిమాండ్ చేసే స్థితిలో నిల‌బ‌డి ఉండేద‌ని అభిప్రాయ‌ప‌డుతున్నారు. ఈసారి తాను లొంగిపోతే పూర్తిగా న‌ష్ట‌పోతామ‌ని, చంద్ర‌బాబును మ‌రోసారి ఎందుకు ముఖ్య‌మంత్రి చేయాలి? అంటూ కార్య‌క‌ర్త‌లు, నాయ‌కులు అడుగుతున్నార‌ని, తాను త‌గ్గితే ఒక ప్ర‌ధాన సామాజిక‌వ‌ర్గంతోపాటు త‌న‌కు, పార్టీకి దీర్ఘ‌కాలంలో న‌ష్టం జ‌రుగుతుంద‌నే అభిప్రాయంలో ప‌వ‌న్ ఉన్నారు.