నేటి నుంచి 9రోజులపాటు జగన్నాధుని రధయాత్ర: స్వామి శ్రీనివాసానంద సరస్వతి

శ్రీకాకుళం నగరంలోని బొందిలీపురంలో బావాజీ మఠం ఆచార సాంప్రదాయాలకు అనుగుణంగా జగన్నాధ రథయాత్ర యధావిధిగా జరుగుతుందని నిర్వాహకులు వెల్లడించారు. బొందిలీపురంలోని జగన్నాథ మందిరంలో గురువారం నిర్వహించిన మీడియా సమావేశంలో ఆంధ్రప్రదేశ్ సాధు పరిషత్ అధ్యక్షుడు స్వామి శ్రీనివాసానంద సరస్వతి , రథయాత్ర నిర్వాహకులు బాలకృష్ణ పాణిగ్రాహి , సురేష్ పండాలు మాట్లాడారు. మఠానికి సంబంధం లేని కొంతమంది వ్యక్తులు ఈ ఏడాది పీఠాధిపతి రఘువీర్దాస్ మృతి చెందిన కారణంగా రధయాత్రను నిర్వహించడం లేదని చేస్తున్న ప్రచారాన్ని తప్పుపట్టారన్నారు. ఆయనకు సంబంధించిన కార్యక్రమాలను కొనసాగిస్తామని , దాని కారణంగా దైవ కార్యక్రమమైన రథయాత్రలను రద్దు చేయడం జరగదని స్పష్టం చేసారు. ఈ మేరకు శుక్రవారం నుంచి 9 రోజుల పాటు రథయాత్రను అంగరంగ వైభవంగా నిర్వహించేందుకు తగిన ఏర్పాట్లు పూర్తి చేసినట్లు వారు వివరించారు. తరతరాలుగా బావాజీ మఠం ఆధ్వర్యంలో శ్రీక్షేత్రం తరహాలో తొమ్మిది రోజుల పాటు రథయాత్రను నిర్వహించడం ఆనవాయితీగా వస్తున్నట్లు తెలిపారు.

ఈ వేడుకల్లో భక్తులు వేలాదిగా పాల్గొని సుభద్ర , బలభద్ర సమేత జగన్నాధస్వామి వారిని దర్శించుకుంటారని , గత రెండేళ్ళు కరోనా కారణంగా వేడుకలు నామమాత్రంగా నిర్వహించామని , అయితే ఈ ఏడాది వైభవంగా నిర్వహించడానికి సన్నాహాలు జరిగాయని వివరించారు. రథయాత్రను నిర్వహించకూడదన్న అక్కసుతో కొంతమంది రధాన్ని విరగదీసారని , దీని స్థానంలో వేరే రథాన్ని కూడా సిద్ధం చేసామని వివరించారు. రథయాత్ర నిర్వహణపై భక్తులు ఎటువంటి అపోహలు నమ్మవద్దని , శుక్రవారం నుంచి జరగనున్న యాత్రలో పాల్గొని స్వామివారిని దర్శించుకుని ఆయన కృపకు పాత్రులు కావాలని కోరారు. మీడియా సమావేశంలో బజరంగ్ దళ్ జిల్లా అధ్యక్షుడు రావాడ రాజశేఖర్ , విశ్వహిందూ పరిషత్ కార్యదర్శి శ్రీరంగం మధుసూధనరావులు పాల్గొన్నారు.