మీ దగ్గర పుచ్చకాయలున్నాయా...అయితే చైనాలో ఇళ్లు కొన్నొచ్చు

పుచ్చకాయాలతో చైనాలో ఇళ్లను కొన్నచ్చు. అవును మీరు వినేది నిజమే. చైనాలో ప్రాపర్టీ మార్కెట్ తీవ్ర సంక్షోభంలోకి కూరుకుపోయింది. చైనాలో రియల్ ఎస్టేట్ కంపెనీలు పుచ్చకాయలకు, ఇతర వ్యవసాయోత్పత్తులకు ఇళ్లను విక్రయిస్తున్నారు. 3, 4 టైర్ల నగరాలలో రియల్ ఎస్టేట్ డెవలపర్లు ఇటీవల పలు ప్రమోషనల్ క్యాంపెయిన్లు లాంచ్ చేశారని, ఆ క్యాంపెయిన్లలో గోధుమలు, అల్లం వంటి వ్యవసాయోత్పత్తుల రూపంలో పేమెంట్లు చేసేలా గృహ కొనుగోలుదారుల్ని ప్రోత్సహిస్తున్నట్టు అక్కడి మీడియా గ్లోబల్ టైమ్స్ రిపోర్టు చేసింది. అదనపు హౌసింగ్ ఇన్వెంటరీని సేల్ చేసేందుకు.. రైతుల్ని కొత్త ఇళ్లు కొనుగోలు చేసేలా రియల్ ఎస్టేట్ కంపెనీలు ప్రోత్సహిస్తున్నట్టు తెలిపింది.

నాన్‌జింగ్‌లోని ఓ రియల్ ఎస్టేట్ కంపెనీకి చెందిన డెవలపర్‌ కిలో పుచ్చకాయలకు 20 యువాన్లను అంటే భారతీయ కరెన్సీల్లో రూ.236 చొప్పున లెక్క కట్టి ఇళ్లు కొనుగోలు చేసేందుకు గృహ కొనుగోలుదారులకి అనుమతిస్తున్నట్టు ఈ పబ్లికేషన్ రిపోర్టు చేసింది. జూన్ 28 నుంచి జూలై 15 వరకు చేపట్టే ప్రమోషనల్ ఈవెంట్ పోస్టర్‌లో ఇళ్ల కొనుగోలుదారులు 5 వేల కిలోగ్రాముల పుచ్చకాయలను చెల్లింపులుగా చేస్తూ.. ఇళ్లను కొనుగోలు చేయొచ్చని అక్కడి ప్రాపర్టీ డెవలపర్లు చెప్పారు. వాటి వాల్యూ లక్ష యువాన్లుగా లెక్కకట్టారు.

చైనాలో ఈ సంక్షోభం తిరిగి వస్తు మార్పిడి విధానాన్ని తీసుకొస్తుందని రిపోర్టులు పేర్కొంటున్నాయి. నగదును కాకుండా ఇతర వస్తువులను, సర్వీసులను మాధ్యమంగా వాడుతున్నారు. అంటే ఒక వస్తువుకి బదులు మరొక వస్తువును ఇచ్చిపుచ్చుకుంటున్నారు. ప్రస్తుతం చైనీస్ ప్రాపర్టీ మార్కెట్లో ఇదే జరుగుతోంది. పుచ్చకాయలకు, ఇతర వ్యవసాయోత్పత్తులకు బదులుగా కొత్త ఇళ్లను ఇస్తున్నారు. చైనాలో హౌసింగ్ మార్కెట్ ప్రస్తుతం ఆ దేశ భద్రతకు ముప్పుగా మారింది.

చైనాలో ప్రాపర్టీ సేల్స్ జనవరి నుంచి జూన్ వరకు 25 శాతానికి పైగా పడిపోయాయి. రియల్ ఎస్టేట్‌లో డబ్బులు పెట్టేందుకు ప్రజలు బయపడుతున్నారు. ఆ దేశంలో నెలకొన్న ఆర్థిక సంక్షోభంతో ప్రజలు రియల్ ఎస్టేట్‌లో పెట్టుబడులకు వెనక్కి తగ్గుతున్నారు. ఒకప్పుడు 2008లో అమెరికాలో ఆర్థిక సంక్షోభ సమయంలో కూడా అక్కడ ఆరున్నర కోట్ల ఇళ్లు అమ్ముడుపోలేదు. ప్రస్తుతం కూడా అదే పరిస్థితులు చైనాలో తలపిస్తున్నాయి. గతేడాది నుంచే బీజింగ్‌లో ఈ పరిస్థితి ప్రారంభమైంది.

హౌస్‌హోల్డ్ సేవింగ్స్‌కి ప్రాపర్టీ మార్కెట్ గమ్యస్థానంగా ఉండేది. డెవలపర్లు, ఇళ్ల కొనుగోలుదారులు బ్యాంకుల నుంచి రుణాలు తీసుకుని కొత్త ఇళ్లు కొనుగోలు చేసేవారు. కానీ ప్రస్తుతం అక్కడ పరిస్థితులు తలకిందులయ్యాయి. హోస్ హోల్డ్‌ల రుణం 10 ట్రిలియన్ డాలర్లను తాకింది. వీటిలో సుమారు 27 శాతం బ్యాంకు రుణాలు రియల్ ఎస్టేట్‌కి చెందినవే ఉన్నాయని పాలసీ రీసెర్చ్ గ్రూప్ తెలిపింది.